Power & Electricity leh PWD enkawltu Parliamentary Secretary Pu Lal Thanzara chuan Tuirial Hydro Electric Project (60MW) hna thawh mek chu khaihlak lova tluang taka thawh a nih theih nan a panna kawng thu-ah leh lung chang tha lakna kawngah te Sawrkar chuan a tul ang a ti nghal dawn a ni, a ti.

Nimin khan Tuirial Hydel Electric Project a hmunah tlawhin a panna kawng Serkhan, Bagha Road Mizoram PWD in a enkawl,  Natacherra – Saipum road 18 kms –a thui chu uluk taka enin rang zawka he kawng hi hman tangkai a nih theih dan tur a en a. PWD hotute leh NEEPCO hnathawktute nen helai hmuna kawng dinhmun te sawiin Project hna kal mek thawh zawh hun tura tih January 2014 – a hna zawh hman ngei a nih theih nana tihtur tul te an thlir ho a ni.

Pu Lal Thanzara chuan NEEPCO hotuten Mauchar Quarry- atanga Lung/Boulder lak an lo dil chu phalna a pe nghal a, hei hian an hnathawh kawngah thui taka puiin a tichak sawt dawn a ni. NEEPCO –in ram an lak tawh bak ram 5380 Ha.-a  zau Mizoram sawrkarin an kuta hlan tura an ngenna chu Pu Lal Thanzara chuan Special Meeting kovin Sawrkarin ala ngaihtuah ang a ti a. PWD kawng enkawl Natacherra – Saipum 18kms a thui chu tun dinhmunah Furpuiin a nan lai a nih avangin hna hi kalpui reng mahse duh angin hna a chak thei lova. Fur chhe zual a kian veleh chak taka hna kalpui a nih tur thu  a hrilh bawk a. Saiphai khawchhung atanga Bagha panna Retaining Wall July 9 atanga motor lian tlan tlang theih tak loh na siam mek chu a hmunah thlirin an hna tih chak a nih theih nan ruahmanna thar a siampui bawk a ni.

Tuirial-a NEEPCO Office- a amah hmuahna inkhawm tawi neihah Pu Lal Thanzara chuan he Project hi Chief Minister Pu Lal Thanhawla pawhin a tuipui hle thu a sawi a. NEEPCO atanga a kawng te eng engemaw duhthawhna a hnena an thlen chhan nan amah ngeiin a tlawh tak thu sawiin he hna hi kan ngai pawimawh hle a ni, a ti a ni. NEEPCO thuneitute chuan amah ngei inseng sova a tlawh avang leh an hna a a tuipuinaah an lawmzia an sawi bawk.

 Hun engemaw chen hlamchhiah a nih hnuin Tuirial Hydel Project hi January 14, 2011 khan tharthawh leh a ni a. Hna thawh nana sum ruahman chu cheng 913 crores niin thla 36 chhunga thawh zawh tura tih a ni a. Tun dinhmunah hian an hna kal mek hi ala hautakin hna hram tam tak tlang thiah te, tuikhuah Dam tur puahchah te, tunnel siam leh hna bum ro tamtak thawh tur ala awm a. Hetih lai hian an chak lakna tur kawng tha an neih theih nan Pu Lal Thanzara chuan theihtawp a chhuah zel dawn thu a sawi chu helaia thawktuten lawmawm an ti hle a ni.

 Er. Lianchungnunga, E – in- C bakah Official dangten Pu Lal Thanzara hi an tawiawm a ni.