1864/2024-2025

Dated: Mamit the 2nd of September, 2024 : Vawiin khan DC Conference Hall, Mamit-ah tunhnaia fur ruahtui nasa tak avanga Mamit District chhunga chhiatna hrang hrang thlir hovin District Disaster Management Committee chu Pu Jacob Lalawmpuia, Chairman DDMA, District Bawrhsap ni bawk hovin an thutkhawm a ni.

Chairman DDMA chuan tunhnaiah ruah nasa tak sur avangin harsatna hmun hrang hrangah kan tawk a, district ang zawng pawhin a tuar nasa ber kan niin a lang, mipui nunphung ti khaihlak thei inkalpawhna kawng ping, eng leh tuiah te kan tuar nasa hle a, eng angin nge harsatna kan chinfel a nga, hmalam hun atan engtinnge kan inbuatsaih ang tih kan ngaihtuahho a tul a, hemi atana rawtna awmte sawiho leh ngaihtuah tlang tura meeting a nih thu a sawi.

Vawiin thutkhawmah hian mipui nunphung nghawng thei PWD Department, Power & Electricity Department leh PHED atangin harsatna an tawh report ngaihthlak a ni a, PWD Highway Mamit Division huamchhungah hian kawng min 24 awmah 21 chu thenfai/tih tlang a ni tawh a, kawng tih tlang tawhah hian ruahsur a nasat chuan min leh mai thei dinhmuna awm a awm nual a, Tuidai bul min chu engtikah nge a tlang ang tih sawi theih mai a nih loh thu leh thuneitute hnen lamah a siamthat lehna tur thlen mek a ni a, Mausen kawnghlui lam zawh theihin awm tawh mahse kawng enkawl lohna rei tawh a nih avangin lirthei lian chi tana tlan harsa lai ala awm thu leh hemi kawng thawmthata chei thatna tur pawh thuneitute hnenah thlen mek a nih thu report ngaihthlak a ni. PWD Mamit Division huamchhungah khawchhung kawng min neuh neuhte thenfai nual a ni tawh a, Mamit atanga Phaizau panna kawng pawh tunkar chhunga sial tlang theih beisei a ni a. Mamit to Bairabi panna kawng pawh leimin avang hian kaltlang theih ala nilo a ni. PHED Department atanga report dawn danin Phaizau atanga Mamit tuilakna kawng leimin avang hian a chhe vek a, tunah hian theihtawpa hnathawh a ni chungin kar 2 chhung vel tui lak luh theih a ni dawn lo a, mipuite tui renchem taka hmang turin PHED chuan mipuite min ngen a ni. Power & Electricity Department, Mamit Division huamchinah pawh leimin hian electric ban tlu leh awn a siam nasa hle a, Bairabi to W.Phaileng via Mamit eng lakluhna Tower pakhat a bul leimin avangin dinhmun hlauhawmah awm mekin a dang dinhmun erawh kawng tlang loh avanga la chian loh a awm bawk ni. Dt 26.08.2024 thawhtan zan ruahsur avanga P&E Department-in chhiatna an tawh siamtha leh tur hian Rs.7,64,000/- sen a ngaih dawn thu ngaihthlak a ni bawk.

Buhfai dinhmunah kawng kal harsa zual Godown pariatah Oct leh Nov thla thleng stock a awm a, Godown pali Mamit, W. Phaileng, Phuldungsei, Pukzing te erawh an thla mamawh dan a zira pek thin an ni. Oil lamah thlaphanna tur erawh a awm rihlo a thudawn a ni a, LPG trip rawn kal mek a awm thu dawn a ni bawk.

District Hospital Mamit-ah tunhnai khuarel chhiatna kan tawrh avanga hliam emaw harsatna tawk an awm report dawn a nilo a, chhiatna thlen thulha inbuatsaihna erawh kalpui a nih thu dawn a ni bawk.

Vawiin meeting-ah hian W.Phaileng BDO, Reiek BDO leh Kawrtethawveng BDO atangin an huam chhunga chhiatna leh harsatna an tawhte ngaihthlak a ni a, Mamit khawpui chhunga Village council paruk atangin an vengchhung dinhmun hrang hrang ngaihthlak a ni bawk.

Vawiin meeting-ah hian District Disaster Management Authority committee members te tel a ni.