No.704/2020-2021

Aizawl, the 30th April 2020 : Vawiin khan Home Minister Pu Lalchamliana, Disaster Management & Rehabilitation Department changtu ni bawk chuan thlipui leh rial in tunhnaia Mizorama khaw hrang hranga chenna in a tihchhiat dan leh Sawrkar atanga tanpui an dawn dan chungchangah thusawina(Recording) a nei.

Home Minister Pu Lalchamliana Disaster Management & Rehabilitation Department changtu Minister ni bawk chuan kar kalta leh chumi hmaa khuarel chhiatna, thli leh rialin District 9 a khaw 58 a chenna in 795 a tihchhiat thu a sawi a. Heng zinga 46 te chu thuamthat ngaihna awm tawh loin, a chhe vek a, a bak 749 te chu thuamthat theih niin report dawn a ni, a ti.

Chhiat tawk chhungkua te chu heng District a, Deputy Commissioner, District Disaster Management Authority (DDMA) Chairman ni bawk kaihhruaina hnuaiah tanpuina awm thei ang ang te chu pek tuma hmalak mek zel anih thu a sawi a. Saitual District a Hliappui khua in a tuar nasa bik tiin Home Minister chuan rial in chenna in 268 a tichhia a, chung zinga 189 te chu inchung chhe vek, a thar thlak ngai leh a bak chenna in 79 te chu a chung a then chhia te an nih thu a tarlang a. Bialtu MLA in chhiat tawh chungchang a hriat veleh a hmuna kalin a theih angin hma a lak thu a sawi a. Chhiat tawh zan la lain a theih ang angin silpaulin leh rangva awm thei ang ang te chu lakkhawm niin thawm nghal a ni, a ti a. He chhiat tawh te chhawmdawl nan Mizoram Synod in rangva bundle 200 leh a kilhna tur hmanrau hma taka an pek leh Rural Development Department in rangva bundle 100 an pek chu lawmawm a tih thu a sawi a. Sawrkar leh bialtu MLA ten a tukah a theih ang anga rangva zuar te dapin rangva bundle 688 cheng 29,21,197 hu, a ba a lain an thawn chhoh thu a sawi a, rangva man bat hi a rulhna tur Sawrkarin a ngaituah tur thu a sawi lang bawk a ni.

He chhiat tawh chungchanga thenawm khua ten Hliappui a inchhia te siamtha tura hnatlanga an thawhchhuah hian Mizo tlawmngaihna chu a la vul zel a ni tih a ti lang hle a ni, a ti. Sawrkar Laipui inkaihhruaina dan angin heng chhiat tawk te tan tanpuina awm thei ang angte an dawn theih nan Sawrkarin hma a lak mek thu a sawi. Chenna in chhe vek leh a then chhia te tanpuina dawn inthlau lutuk chu a endiktu tan luhaitlak tak a ni a, mahse a theih ang angin hei hi chu Sawrkarin a chinfel tur thu a sawi.

Khuarel chhiat leh chhiatna danga Disaster Management & Rehabilitation Department in direct in kut an thlak lova, DDMA kaltlanga hma lak zel a nih dante leh sum hman tur pawh an kuta awm hlan vek an nih thu Home Minister chuan a tarlang a. Tun chhiat tawh chungchanga Mizo tlawmngaihna lo lang chhuak chu ropui tiin Mizo nih hi nuam a tih thu a sawi a. Kohhran, pawl leh mimal ten mi harsa te tanpui tura ke an rawn pen chhuak chu ropui a tih thu a sawi bawk a ni.

Hliappui a inchung thuamthat nan rangva bundle 890 seng a ni a. Aizawl atangin chhungkhat laina te an chhungte chhiat tawk te tan rangva bundle 52 an thawn chho bawk a ni.

Hliappui a chenna in siamthat nan tha 4033 seng a ni a, heng zinga tha 1887 te chu khualkhua a mi niin a bak tha 2146 te chu tualchhung a mi an ni.

Khaw hrang hranga chenna in chhe zat :

             (# 1 fully damaged; * Kutcha 26, Pucca- 32)