No.7676/2020-2021 

Vawiin hian Serchhip District Task Force on COVID19 Vaccination te chu Pu Lalmuansanga Ralte, MCS, Addl. DC hovin an thukhawm a, Serchhipa CoWIN2.0 kalpui dan tur relin tunkar zirtawp ni atanga Serchhip khawpui hmun 6 a kum upa te Covid19 vaccine pek tan an rel.

Pu Lalmuansanga Ralte chuan, Serchhip District ah Covid19 vaccine tluang taka pek chhoh zel a nih thusawiin medical team thawktute inpeknaah lawmthu a sawi a, hmabak la awm zel te pawh theihtawp chhuaha bei zel tura chahin district administration atanga puih theihna an neih apiangah an pui zel dawn tih a hrilh a ni.

Sawrkar laipui ruahmanna Covid19 vaccine thawh hnihna CoWIN 2.0 ah hian khua leh tui kum 60 leh a chung lam zawng zawng leh kum 45 leh kum 59 inkar bawrhsawmna neuh neuh (Comorbidity) nei te tan a thlawnin vaccine pek leh tur a ni a. He vaccine pek thawh hnihna hi Serchhipah pawh tunkar Zirtawpni (5th March, 2021) atanga kalpui ve turin vawiina committee hian a rel a. Hmun parukah vaccine pekna tur siam a ni ang a, VLTF te nena tangkawpin vengtina kum 60 leh a chunglam zawng zawng te leh kum 45 leh 59 inkar bawrhsawmna dang nei, vaccine pek hma ngai, doctor lehkha nei te chu vaccine hi pek an ni dawn a ni. Vaccine lak dan tur indawt hi Medical lama thuneitute leh VLTF ten an duang anga, veng chhung tlangau hmanga inhriattir a ni thin dawn a ni. Kum 45 leh 59 inkar bawrhsawmna nei, vaccine lak hma ngaite finfiahna Medical Certificate inpek dan tur pawh ruahman thuai a ni ang.