DIRECTORATE OF INFORMATION & PUBLIC RELATIONS, Government of Mizoram, India

4702/202-2025

Aizawl dated 19^th March, 2025: Tukin khan UD & PA Sanitation Site Office, Solomon’s Cave bul ah Pu K.Sapdanga, Minister, Urban Development & Poverty Alleviation Department chuan bawlhhlawh tihtlem leh hmannawn intihhmuh zelna tur a hmalakna ‘Swap & Save Campaign – Sikul Bungraw inthleng runpui’ chu ni March 21 thleng a kalpui turin a hawng.

UD & PA Minister Pu K.Sapdanga chuan bungrua, a hmangtu tan a tangkai tawh lo, bawlhhlawh a chang mai tur kha a tangkaipui thei tur hnen a kan hlanchhawn hian midang tan a malsawnna thlentu kan nih mai bak ah bawlhhlawh siam tlem kawnga thawktu pawimawh tak kan ni bawk a. Hemi kawnga UD & PA Department kaltlanga ‘Swap & Save Campaign – Sikul Bungraw inthleng runpui’ kalpui a ni chu lawmawm a tih thu a sawi.

Pu K.Sapdanga chuan bawlhlawh titlem tur a ‘Swap & Save Campaign’ kalpuina hian khawtlangah midangte tan a tangkai ni duhna thinlung put tirna a thlen ngei a beisei thu sawiin ‘Sikul bungrua inthleng runpui’ chu bungrua thawhtute leh dawngtute tan hlawkna ve ve a nih tur thu a sawi a. Mi tam thei ang berin he Campaign hi an chhawr tangkai theih nan thawktuten zau thei ang bera mipui hnena a thehdarh leh zirtir hna an kalpui tel a pawimawh thu a sawi bawk a ni.

‘Swap & Save Campaign – Sikul Bungraw Inthleng Runpui’ hawnna hi Pu Lalmalsawma Pachuau, Secretary, UD&PA in a kaihruai a, Pu Jacob Lalawmpuia, Director chuan UP & PA Department hnuai a bawlhhlawh titlem tur a ‘Reduce, Reuse, Recycle’ tih thupui hmanga hmalakna kalpui thin dan leh March ni 19 – 21 chhung a Aizawl khawpui chhunga Self Help Group Area Level Federation 7 kaltlanga ‘Swap & Save Campaign’ kalpui dan tur a tarlang bawk a ni.

He hun a tarlan danin kum 2023 khan Ministry of Housing and Urban Affairs leh Lifestyle for Environment tangkawp buatsaih Meri Life Mera Swachh Shehar Campaign hnuaia RRR Centre (Reduce, Reuse, Recycle Centre) chu Mizoramah pawh kalpui a ni a. Aizawl huamchhunga AMC Ward tinah RRR Centre chu May ni 15, 2023 atanga June ni 5, 2023 chhung hawn niin Ward councillor-te leh vengchhung MHIP, YMA, SHG leh Local Council-te tangkawpin he campaign hi hlawhtling tak a kalpui a lo ni tawh a ni.

Reduce, Reuse, Recycle Centre ah hian mipuiten an thil hluihlawn tawh leh an tana tangkai tawh lem lo; thawmhnaw, pheikhawk, lehkhabu, toys, inchhung bungrua leh adangte a mamawhtu ten an lo hman tangkai theih tura an rawn dahkhawmna (donate) hmun tur a ni a. A rawn dah lut tute pawhin an mamawh zawng hmannawn theih leh hman tangkai theih an neih chuan an la thei bawk a ni. Amaherawhchu, thil hmannawn ngaihna awm tawh lo leh tangkai tawh miah lo tur paih khawmna hmun a nih loh angin bawlhhlawh paih khawmna hmun anga ngaih tur a ni lo a ni.

Pu Jacob Lalawmpuia, Director, UD&PA tarlan danin ‘Swap and Save’ Campaign tum ber chu zirlaiten an zirlaibu, uniform, pheikhawk, school bag, box, tiffin etc. te an hman tangkai tawh lo tur an rawn dah theih nan leh an mamawh angte a thlawna an lak ve theih nana duan a ni a. He hmalakna hian chhungkaw tam tak phurrit a chhawk zangkhai a beisei thu leh school bungraw hlui la tha si te paih mai aia a hmang tangkai turte hnen a thlen hi a thil tum pawimawh ber a nih thu a sawi.

‘Swap & Save Campaign’ hi March ni 19 atanga ni 21 thleng a hnuai a hmun tarlan ahte hian kalpui a ni dawn a ni;