Lunglei-a Chhim Bial Chhantute sawihona thuchhuak chungchang, Lunglei-a UD&PA Department pawisa Rs.11,21,57,000/- atangin Rs. 48,35,264/- hmanna chauh hmuh a niin, Rs.10,73,21,736/- awmna chin hriat ni lo anga sawi a ni a, thil awmdan dik tak chu hetiang hi a ni:

F. Zothuama, Lunglawn, Lunglei chuan RTI Act hmangin UD&PA Directorate-a SPIO hnenah 2009-2010 leh 2010–2011 chhunga Department pumpui budget leh District wise a pekchhuah dan a rawn zawt a, hetah hian UD&PA Deptt.-ina Lunglei District pumpui tana sum hmanna zawng zawng pek a ni a, a vaiin Rs. 11,21,71,000/- a ni a, chungte chu:-

Heng sumte hi chin hriat loh emaw bo emaw a awm lova, hnathawhna kawng hrang hrangah a hmanna tur dik taka hman an ni.  Chungte chu:-

1. JNNURM : JNNURM hnuaiah hian UIDSSMT Scheme-ah Renewal of Lunglei Water Supply Scheme hnathawh mek a ni a, PHE Deptt. in an enkawl a, sum pawh hi PHE Deptt. kaltlanga pek chhuah a ni.  2009-2010 chhungin hemi atan hian Rs. 476.85 lakhs pek chhuah a ni a. Tin, JNNURM hnuaiah tho hian IHSDP hnuaiah mi rethei chhungkaw 500 insakna kalpui mek a ni a, chumi atan chuan 2009-2010 chhungin Rs. 413.71 lakhs  pekchhuah a ni. Hei pawh hi District office kaltlang loa beneficiaries-te hnena bank account kaltlanga pek chhuah a ni.

Heng hnate hi a taka kalpui mek an ni a, sum pek chhuah dan leh hmalaknate a chipchiara hre duh tan en theih reng a ni.

2. NORMAL ( PLAN & NON PLAN) : Lunglei-ah hian UD&PA Deptt. District Office (District Urban Development Office) a awm a, an inenkawlna tur leh District level-a hna an lo thawh ve na turin kum tin budget-ah hian sum Plan leh Non-Plan ah engemaw zat pek ve thin an ni a.   Heng hi hlawh atan te, office enkawlna atan te, bawlhhlawh paih nan te, bawlhhlawh paihna motor enkawlna senso atan te, khawpui chhung hna tul hrang hrang (minor works) thawhna atan te hman a ni thin a, RTI Act hmanga zawhnaah hian UD&PA district wise budget ti-a a zawh avangin District office-a sum release zawng zawng, hlawh leh office enkawlna tel vekin pek a ni.

3. SJSRY  : SJSRY hi CSS a ni a, District Urban Development Officer, Lunglei hi SJSRY, Lunglei District atan District Project Officer a ni nghal a ni.  SJSRY tana sum kan hmuh (Central leh State Share) te hi State Level (Directorate) ah leh District office ah semchhuah vek thin a ni a, office (SJSRY Cell) inenkawlna atan leh khawpui mi rethei chawikanna scheme hrang hrang hnuaia hna hrang hrang leh training senso atante hman a ni. Chuta tan chuan 2009-2010 ah Rs. 44.51 lakhs leh 2010-2011 ah Rs. 77.16 lakhs te Lunglei tan pek a ni a, heng sumhmanna chip chiarte hi DUDO, Lunglei ah en theihin a awm a ni.

Hei hi thil awmdan a nih laiin Pu F. Zothuama tho hian DUDO, Lunglei lamah RTI Act hmang tho in Lunglei District tana UD&PA Department kaltlanga hnathawh leh sum sen zat a hranpain a lo dil chhuak veleh bawk a lo ni a.  DUDO, Lunglei pawh hian he RTI Act hmanga zawhna hi District Office atanga ama record atangin dik takin a lo chhang ve bawk a. Amaherawhchu, DUDO, Lunglei chhanna ah hian JNNURM sum (PHE kuta lût leh mi rethei insakna atana hman) te hi a tel ve lova. Heng bakah hian DUDO, Lunglei hian RTI zawhna ang takin a chhannaah hian minor works atana sum sen zat chauh a pe a, thawktu hlawh leh office inrelbawlna atana sum senso te a ziak tel lo bawk a. Tin, hmalakna dang, eg., bawlhhlawh paihna senso, SJSRY hnuaia mirethei BPL training pekna senso etc. pawh a tel lo bawk a ni.

A zawhna zawttu leh Chhim Bial Chhantu lamte hian a chipchiar rawn chhui tawh si lovin, Directorate lam atanga Lunglei District tana sum hman zat leh District Office-in hnathawhna atana sum an hman zat khaikhinin a inthlauhna hi bo angin an chhuah ta mai a.  Thil hrechiang tawk lova Department leh Sorkar nasa taka mualpho theihna tur hetiang thuchhuah ansiamhi a pawi hle a ni.

UD & PA Deptt. hian Lunglei District leh Lunglei khawpui tan hian hmasawnna leh rethei chawikanna hma nasa takin a kalpui mek a.  RTI chhanna a lang tel thei chiah lo Department Budget pawn atangin 10% Lumpsum hnuaiah NBCC kaltlangin, heng :-

1)                 Development Scheme forLungleiTown     -              Rs. 1877.40 lakhs

2)                 Convention Centre at Lunglei                            -              Rs. 1367.53 lakhs

te hi thawh mek an ni a.  Tin, Central Scheme thar RAY hnuaiah Lunglei Town hi hmalakna tura thlan a ni a, hemi hnuaiah hian rethei chawikanna hna lian tak thawh tura ruahman chhoh mek a ni.

Lunglei Chhim Bial Chhantute’n thahnemngaihna thila Department sum chevel leh hmalakna an lo thlir tel hi Department chuan lawmawm a tih hle rualin, heti anga Department hnuaia cheng vaibelchhe sawm chuang lai bo ang thawthanga inpuhna anga ngaih theih tura thil a lo lang hi UD&PA Department chuan pawi a ti hle a. Tarlan tak angin heng pawisa te hi a bo lova, hmasawnna hna hrang hrang leh office hna tul hrang hrang leh inenkawlna atana pekchhuah leh hman an ni a, heti anga Department hming hliau theihna hawi zawnga hmalakna awm hi pawi kan ti hle a, tun hnuah thleng tawh lo se kan ti hle.