No.6281/2020-2021

Aizawl, 20th October 2020 : Vawiin khan Dr.C.Vanlalramsanga, Commissioner & Secretary, UD&PA kaihhruaina hnuaiah UD&PA Director office chamber-ah ‘Consultative Meeting on The Draft Mizoram Urban Development & Building Bye Laws, 2020’ neih a ni.

‘Draft Mizoram Urban Development & Building Bye Laws, 2020’ hi UD&PA buatsaih a ni a. Ministry of Housing & Urban Affairs leh Town & Country Planning Organisation, New Delhi-in a tihchhuah ‘Model Building Bye Laws, 2016’ leh Aizawl Municipal Corporation Building Regulations (Amendment), 2019 bakah AMC (Site Development & Slope Modification) Regulation, 2017 zulzuia siam a ni.

He ‘Bye Laws’ buatsaih mek hian insak lam kaihhnawih reng reng, sak hma atanga sak lai leh sak thar tur, a then lai thiah emaw siamthat emaw, in pum thiah emaw zawm emaw chungchanga zawm turte a huam ang. Mizoram chhunga Khawpui 23 (Urban Areas) te tana hman tura buatsaih mek a ni.

Vawiin meeting-ah hian Pi Lalthanghliri Pautu, Asst. Director (Plan) chuan presentation pein ‘Draft Bye Laws’ chungchanga hriattur pawimawhte a sawifiah a. Hemi hnu hian sawihona leh inrawnkhawmna hlawhtling tak neih zui niin, Pu H.Lianzela, Director, UD&PA chuan kalkhawmte hnenah lawmthu sawiin hun a khar nghal a ni.