Vawiin 15th December, 2017 chhun dar 12:00 khan UD&PA Minister office-ah Upper Khatla phei Baptist House awmna leh a pan pheina kawngpui siamthat dan tur PWD, DC AIzawl, Geology & Mineral Resources leh UD&PA Officer te UD&PA Minister kaihhruaina hnuaiah an sawiho. Circuit House awmna thin chu Aizawl Convention Centre sakna atana ruahman a nih lai leh a hmun buatsaih a nih laiin a awmna lei a nghet lo tih hmuhchhuah a ni a. Hemi avang hian a chhak lama building awm BSNL Office, Bible House leh Baptist House te chu a tiche tih hmuh chhuah a ni a. A che nasa ber Bible House chu Aizawl District Disaster Management Authority thupek angin thiah a ni tawh nghe nghe a, Baptist House pawh a luahtute chhuahsantir an ni nghe nghe a ni. Bible House awmna thin kawngpui chanve lai mai chu lei tlahniam avangin a min a, a bula Baptist House thlanglam sir innghahna lei chu a chê bawk a ni.
UD&PA Minister chuan, he lai hmun hi hmun pawimawh, mipui leh motor veivah tamna a nih avangin siamthat thuai a ngai a. Chutianga hmalak a nih thuai theih chuan vawiina meeting chuan Hazard Safety Cell Chairman Pu Henry Lalmuankima, CE, PWD kaihhruainain PHED, UD&PA, Geology & Mineral Resources officer ten a hmunah en theih ni se tih an rel a, remchang hmasaah enin report siam ni se, furpui lo thlen leh hmain helai hmun hi siamthat dan ngaihtuah ni se an ti a ni. Circuit House awmna hlui laih zawl tak chu hmun thenkhatah a lei tihngheh nan earth piling tih ni se tiin an rel a, hemi atan hian Geology & Mineral Resources hmanrua neih bakah PHED leiverhna hman theih dan ngaihtuah ni bawk se tiin an rel a ni. Vawiina Minister hoa meeting chuan Circuit House awmna thin laih zawl tak chu gabion wall siam belh ngai a awm chuan siam belh ni se, a hmun hi mipui vanltang tana hman tangkai a nih theih nan UD&PA-in site plan siamin a tul angina bawhzui nghal ni se an ti a ni. Baptist House bakah hian a bul kawng chu siamthat a nih theih nan CE PWD Pu henry Lalmuankima chuan tihdan tur an ruahman mek thu leh thawh thuai theih an beisei thu an sawi a, furpui lo thlen hmaa hna thawh zawh dan pawh an ngaihtuah mek thu a sawi bawk a ni.
Minister Pu Zodintluanga chuan UD&PA-in Aizawl khawpui mamawh project pawimawh tak mai kalpui a nih laia duh loh anga harsatna Sorkarin kan han tawk leh Bible House leh Baptist House tana harsatna a han awm chu pawi a tih thu a sawi a, theihtawpin sorkarin a siamthat hna a thawk chho mek a, Sorkar zai ngaia lo nghah hram hram a tul thu a sawiin, Bible Society leh Mizoram Baptist Kohhran hotute dawhtheihna leh nghahtheihna a fak thu a sawi a ni.
Vawiina meetingah hian UD&PA Secretary Dr C Vanlalramsanga, UD&PA Joint Secretary Pu Vanlalmawia, CED PWD Pu henry Lalmuankima, Aizawl DC aiawh Pu John LT Sanga Addl DC, G&MR Director Pu Lalhmachhuana leh officer dangte an te a ni.
