1071/2024-2025

Aizawl, 4th July, 2024 : Vawiin khan UD&PA Minister Pu K. Sapdanga hovin UD&PA Department hnuaia office hrang hrang - Aizawl Municipal Corporation, Directorate of UD&PA leh Aizawl Smart City Limited te tangho hmalakna tur “Comprehensive Plan for Municipal Waste Management in Aizawl” atan thawhhona thuthlung (agreement) ziah a ni.

He ruahmannain a tum ber chu sawrkar department mai bakah private entity leh mipui mimir tanhona hmanga Aizawl hi India ram khaw fai berte zinga siam a ni. He ruahmannain a ken tlangpuite chu: 

1.    Khawpui kawtthler leh mipui vantlang hmun mai bakah lui leh kawr te bawlhhlawh awm lo leh fai taka siam. 

2.    Bawlhhlawh tawih thei hi mumal taka sawngbawl mek a ni a. Tuirial-ah a sawngbawl hna kalpui mek a ni. 

3.    Bawlhhlawh tawih thei lo te chu a sawngbawl dan tur leh a paihna hmun turah chauh paih dan tur ruahman a ni a. Hemi atan hian Material Recovery Facility chu Luangmual IGC hmunah din turin hma lak mek a ni. 

4.    Tunhma atanga Bawlhhlawh lo intiang vum sa te thianghlim tak leh awmze nei deh ral tum a ni. 

5.    Aizawl District leh District dang 4 – Kolasib, Mamit, Serchhip leh Saitual a Hospital leh healthcare facilities hrang hrang a bawlhhlawh te chu a halralna hmunah thianghlim taka tih ral tum a ni a. Hemi atan hian Common-Bio Medical Waste Facility chu Tuirial ah din niin, tun ah hian thla 2 chhung atan trial nei turin ruahmanna kalpui mek a ni. 

6.    Leivung paihna mumal taka siam turin hmalak mek a ni bawk a. AMC in hmun hrang hrang an ruahman sa bakah Khatla ah leivung paihna tur hi a thar siam mek a ni bawk. 

7.   Insakna bungraw hluihlawn paihna leh sawngbawlna tur pawh Hualngohmun-ah ruahman mek a ni. 

He agreement sign tute chu: 

1.    Pu K. Sapdanga, Minister, UD&PA Department. 

2.    Pu Lalrinenga Sailo, Mayor, AMC 

3.    Pu Lalmalsawma Pachuau, Secretary, UD&PA 

4.    Er. Lalhriatpuia, Municipal Commissioner, AMC 

5.    Dr. Andrew H Vanlaldika, Director, UD&PA 

6.    Pu CC Lalchhuangkima, CEO, Aizawl Smart City Limited.