1398/2025-2026
Aizawl Vawkhniahzawn thla ni 29, 2025: Vawiin khan AMC Building, Thuampui, Aizawl ami sakbelhna tur lungphum phumna hun, Ch. Chhunga Bus Terminal, Thuampui-ah hman a ni a. UD&PA Minister Pu K. Sapdanga chuan khuallian niin hun hi a hmanpui a, PHED Minister Prof. Lalnilawma pawhin telpuiin, Pu Lalmalsawma Pachuau, UD&PA Secretary-in hun hi a kaihruai a ni.
Khuallian chuan AMC Building sak thatna tur atana SASCI Incentive grant 50Cr hmuh a ni chu hnathawh that vang a nih thu sawiin hmasawnna lawmawm tak a nih thu a sawi a. Building sakbelhna hi thawktute nuamsa zawka awmna tur ni lovin mipui tam zawkte tana luanchhuahna tur a nih thu a sawi. AMC chu Sawrkar chhawmdawltu pawimawh tak, ram rorelnaa hmun tangkai tak luahtu an nih thu sawiin State sawrkar leh Municipal body te inkarah thawh hona tha a ngaihpawimawh thu a sawi a, inepna awm thinte siam thaa, inlaichinna tha zawk siam a nih theih nan thawh hona thuthlung tha tak siam a nih tawh thu a sawi bawk a. Municipal-ah hian eng Party pawh lo sawrkar sela, mipui tana tangkai taka thawk ho zel tur an nih thu a sawi a ni.
Pu Hrangthanga Zote, Chief Engineer, Building & Other Departments, PWD hnen atangin technical report ngaihthlak a ni a. Building sakna tur hi SASCI, Part-IV (2023-2024) atanga hmuh niin AMC Building awm sa sak zauh belh a ni dawn a. Building awm sa hnunglam leh hmalam bakah in chunglamah chhawng 3 sak belh tur niin, Basement leh Ground-floor chu Garage atana hman a ni ang a, 2nd floor chu Shopping Mall atana hman tur a ni ang a, 3rd - 5th floor chu Office tur niin 6th floor chu Conference Hall ni tura ruahman a ni a, Building sak hna thawk tur hian Contractor - BM Infrastructures thlan an nih thu leh April thlaah work order pawh pek an nih tawh thu a sawi bawk.
Pu Lalrinenga Sailo, Mayor, AMC pawhin thu sawiin AMC bul tan chhoh dan leh an hmalakna leh hmachhawp hrang hrangte a tarlang bawk.
Lungphum phumna hunah hian AMC Councillors-te bakah UD&PA leh AMC, Aizawl Smart City Ltd atangtein mi pawimawhte an kalkhawm a, Pu Joseph H. Lalramsanga, Municipal Commissioner, AMC chuan lawmthu sawiin hun hi a khar a ni
