UD&PA Minister Pu Zodintluanga chuan kum 2033 thlenga Aizawl khawpui chhunga tui mamawh tur pump chhuah a thlitfim theihna tur tui pump-na project thar, "Augmentation of Water Supply and Construction of 37 MLD Water Treatment Plant", NERCCDIP hnuaia SIPMIU Aizawl, UD&PA Department thawh tur chu Tanhril, Mualkhang ramah vawiin khan lungphum a phum.

Minister Pu Zodintluanga chuan Augmentation of Water Supply and Construction of 37 MLD Water Treatment Plant  chu Mizoram tan leh a bik takin Aizawl khawpui a chengte tan thil lawmawm tak a nih thu a sawi a. Aizawl mipui tana tui in tur buatsaih chu kawng hrang hrangin hun hrang hrangah hma lo lak a ni tawh thin thu sawiin, tuna hman lai mek Greater Aizawl Water Supply Scheme Phase-I chu mi 80,000 chawm thei tura buatsaih, kum 1988 kum tawpah Commission a nih thu leh May, 2007 khan mi 2,00,000 chawm thei tur Greater Aizawl Water Supply Phase-II hi chu buatsaih leh a lo nih tawh thu te leh, Greater Aizawl Water Supply Scheme Phase I leh Phase II tui pump theih belhkhawm hi 34.8 MLD (Million litres per day) laia lian a ruahman a nih thu a tarlang a. Amaherawhchu, Aizawl-a mi cheng an pung zel a, chumi rual chuan tui pump khawl te pawh a lo hlui chhovin a pump theih zat pawh a lo tlak hniam ve hret hret avangin mipuiin an khawp kham loh tan avangin Aizawl khawpui tan tui in tur pump chhoh belh a tih len a lo tul tak thu a sawi a.

Minister chuan tun dinhmunah Aizawl khawpui chhungah mipui 3,39,000 vel awm ang a chhut in mipui tui mahmawh zat chu 54.64 MLD a nih laiin 34. 8 MLD pump chhohna tur bun mek a ni a, chutah pawh chuan a khawl hlui tawh avangin 24 MLD vel chauh hi a tak a pump chhuah theih chu a ni, a ti a. “Tunah hian Tlawng Lui atanga tui lakna thar Greater Aizawl Water Supply Augmentation Phase III Project hmang hian tui tam zawk lak belhna tur ruahman niin, he project hian kum 2033 a Aizawl khawpui mipui cheng mipui 4,45,000 chawm thei tur in tui 37 MLD pump chhoh belhin kan mamawh (demand) 71.22 MLD kan phuhruk thei tawh dawn a; hei hi a lo puitlin hunah chuan Aizawl mipuiin tui kan dawn theih zat chu chawhrualin 135 lpcd (Litre per capita per day) lai a lo ni thei dawn ta a, nitin tui kan dawng thei tawh dawn a ni,” Pu Zodintluanga chuan a ti a. Aizawl Water Supply Phase III hna hi zawh fel a nih hma pawhin Distribution System thar te peih fel a nih tur thu leh, Dedicated Power Supply pawh peih fel thuai a nih dawn avangin heng hmalaknate hi peih fel a nih hunah chuan Aizawl khawpui chuan tun aia tha zawkin tui a dawng thei dawn a ni, a ti bawk.

Minister chuan NERCCDIP hnuaia hmalakna kalpui kawngah SIPMIU Aizawl Unit chu India hmarchhak state dangte aia a thawh that fal bik thu leh, state dang thenkhat hnathawh mumal loh avangin Asian Development Bank atanga an fund dawn tur ruahman, hman theih ni silo ral mai tur chu a thawk tha state ten an insem tak azarah Mizoramin a fund dawn tur let a dawn phah tak avanga he project hi kalpui a nih tak thu a sawi a. Minister chuan khawpui chhung faina leh thianghlim zawkna tura hnathawh kal mek avangin veng hrang hrangah SIPMIU hmalakna in mipui harsatna a thlen thin chu pawi a tih thu sawi telin, sawrkar chuan a theih chen chenah department hrang hrangte hnathawh chu coordination tha tak nei chunga invawrem taka kalpui a tum thin rualin, project hmuh hun leh thawh theih hun te a inrem loh leh innghah theih thina nih loh avangin duhthusam lo deuha kal a tul changte a awm thu a sawi a. Chutihrual chuan hengte hi khawpui changkanna leh hrisel tlanna tur a ni tih mipuiin hriatpui tura a duh thu a sawi.

Water Treatment Plant lungphum phumna inkhawm hi Dr. C. Vanlalramsanga, UD&PA Secretary chuan a kaihruai a. Pi M. Zohmingthangi, AMC Councillor leh Women's Commission Chairman ni bawk leh AMC Councillor engemawzah leh Department hotu thenkhat an tel a ni. Er. Valbuanga, SIPMIU Program Director chuan he Plant hi sak a nih dan tur leh hnathawh dan tur Technical Report a pe a, Pu Vanlalmawia, UD&PA Joint Secretary chuan lawmthu sawiin hun a khar a ni.

Vawiina hawn tak "Augmentation of Water Supply and Construction of 37 MLD Water Treatment Plant" hi a thawhna contract amount chu Rs. 156.67 crore niin contractor-te chu M/s Eco Protection Engineers Pvt. Ltd. Chennai leh M/s AV Rambabu Infra Pvt. Ltd. Hyderabad ten an thawk dun a. He hna hi March 2017 atanga thawh tan tawh a ni a, May 2020 ah zawh hman kan beisei a ni. Setlak lui leh Tlawng infinna kaiah tui lakluhna (intake) siam ruahman a ni a, Tanhril, Mualkhang ramah he tui lakluh sawngbawl thianghlimna hmun (Water Treatment Plant) hi siam tum a ni bawk. Laipuitlang tuikhuah chawm tur a ruahman Water Treatment Plant hi meter 1,000 chuang zet a hniam a nih avangin tui pump hna hi chhawng hnih a kalpui tur a ni a, Intermediate Pumping Station hi Industrial Growth Center, Luangmual ah siam a ni dawn a ni. Tui lakna hmun atanga Laipuitlang tuikhuah thleng tur hian 14.75 km a sei pipe zam chhoh a ngai dawn a, he pipe len zawng hi 711mm (diameter) a lian a ni. He hmalakna hnuaiah hian Laipuitlang Main Reservoir pawh RCC a sak that a ni ang. He plant atang hian tui litre nuai 16 chuang darkar khat ah pump theih tura ruahman niin, Greater Aizawl Water Supply Phase I leh II aiin a lian zawk a ni.

Tuna Aizawl khawpuiin tui semna (Distribution Network) hmanlai mek hi kum 30 zeta upa a ni tawh a, a thara thlak a lo ngai tawh a, chubakah Distribution Network Design fel tawk lo te a awm avangin tui sem a rual khai tak tak thei lova. Chuvang chuan tui semna Distribution Network hi design that leh a thar tha zawka thlak hna chu SIPMIU, Aizawl-in tunah hian a thawk mek a: tui pipe 362 km a thui phum tura ruahman ah a zatve dawn zo tawhin thawh chhunzawm mek a ni bawk a ni. Chung bakah chuan veng tina tui dahkhawlna tuizemlian pawh siambelh zel a ni a. SIPMIU Project hnuaiah hian Project I, II leh III ah tuizem 30 lai ruahman a ni in, 10 chu zawhfel a ni tawh a, 20 dang pawh peihfel tep a ni tawh bawk. Tui pump-na atana hman tur liau liau in Power pekna tur (Dedicated Power Supply System) buatsaih mek a ni a. Tunah hian 132 Kv Substation leh a hrui kalna tur Tower 20 buatsaih hna pawh zawh fel mai theih turin SIPMIU, Aizawl hian a thawk mek bawk.