670/2025-2026
Aizawl, 30th May, 2025 : UD&PA Minister Pu K. Sapdanga’n vawiin khan cheng nuai 481 senga sak Chaltlang Multi-Utility Centre, Chaltlang Dawrkawn ami chu ribbon chep chatin a hawng a, bialtu MLA, PWD Minister ni bawk Pu Vanlalhlana’n khualzahawm niin he hun hi a hmanpui bawk a ni.
Chaltlang Multi-Utility Centre Conference Hall-ah hawnna inkhawm buatsaih a ni a, hetah hian khuallian Pu K. Sapdanga chuan thu sawiin, sawrkar pathum kutthlakna Chaltlang Multi-Utility Centre tha taka puitlin a ni ta chu thil chhinchhiah tlak tak a ni a ti a, bul lo tantu leh hma lo la chhunzawm tu sawrkar kaltate chungah lawmthu a sawi a, a hmunhma a kham awih em avangin hna hautak tak a ni a ti a, a satu contracotor leh a viltu department officialte thahnemngaihna leh tumruhnaah lawmthu a sawi bawk a ni.
Pu K. Sapdanga chuan Chaltlang Multi-Utility Centre chu uluk tak leh fimkhur taka hmang turin helai hmuna thali leh sa zuara thu turte a chah a, local council te pawh uluk taka vil thin tura chahin hetiang project hi hmun hrang hrangah kalpui mek a nih vangin an inrelbawl dan kan entawn dawn a, a enkawltute thlengin kan entawn tur in nih avangin hmahruaitu nih tling tak in nih kan beisei a ni a ti a, sawrkar nen tanghovin mi tamtakin Multi-Utility Centre hi eizawnna ngelnghet an neihna hmun a nih a beisei bakah, khawlai faina kawngah pawh hmasawnna thlentu a nih a beisei thu a sawi bawk a ni.
Kualzahawm, bialtu MLA ni bawk Pu Vanlalhlana pawhin Chaltlang Multi-Utility Centre chu Chaltlang mipuite nghahhleh a nih thu sawiin changtlung tak leh tha taka sak zawh a ni ta chu lawmawm a tih thu sawiin UD&PA Minister leh Department chungah lawmthu a sawi a, tha taka enkawl chu khawtlang hruaitute leh mipuite bat a nih thu sawiin entawn tlaka felfai taka hma la turin a chah bawk a ni.
Chaltlang Multi-Utility Centre hi Mizoram State Fund atanga sak niin a project hming chu “Implementation of Public Utility Project Providing Multipurpose Parking-cum-Vegetable/Meat Market at Chaltlang, Aizawl” ani a, Implementing Department chu Urban Development & poverty Alleviation Department niin, building satu contractor hi Biakliana & Sons, Mission Veng, Aizawl an ni.
Chaltlang Multi-Utility Centre January ni 12, 2021 a sak tan niin, April ni 30, 2025 khan sak zawh a ni a, building hi chhawng thum a sang a ni a, basement pahnih a wm bawk a ni. Basement-I hi sa zawrhna tura duan niin mi 15 luah theih tura ruahman a ni a, Basement-II hi two-wheeler 40 dah theihna parking lot atana ruahman a ni a, Ground Floor pawh hi four-wheeler 8 dah theihna tur parking lot atana ruahman a ni. First Floor leg second Floor hi chawhmeh zawrhna (vegetable market) atana ruahman niin floor tin hi mi 17 thut theihna tura buatsaih a ni. Third Floor-ah hian Conference Hall changtlung taka thuam a awm bawk a ni. Floor leh basement zawng zawngah hian vantlang inthiarna (mipa leh hmeichhe inthiarna a hrangin) dah niin bucket leh tui suahna mug dah vek a ni a, wall fan leh ceiling fan dah vek niin surveillance camera (cctv) dah vek a ni bawk.
Chaltlang Multi-Utility Centre foundation atan hian Isolated RCC Footing hman a ni a, parking lor chhuat phah (floor) atan hian Kota stone hman niin, floor dangah hian vitrified floor tiles hman a ni a. Chokut-ah 1st class wood hman niin, Masonite Doors vuah a ni a, tukverh frame atan hian aluminium hman a ni. Power supply lakluh nan Three Phase 4-wire system connection dah a ni a, tui connection zawh fel tep a ni a, wataer tank 400 ltrs dah niin tui pump pahnih dah a ni bawk.
Chaltlang Multi-Utility Centre hawnna inkhawm hi UD&PA Secretary Pu Lalmalsawma Pachuau-in a kaihruai a, Er. C. Malsawma, EE, UD&PA in technical report pe in, Chaltlang aiawhin Local Council Chairman Pu Lalthanruma Sailo-i’n thu a sawi a, UD&PA Director Pu Jacob Lalawmpuia’n lawmthu sawiin hnu a khar a ni.
