2026/2026-2027

Dated Aizawl, the 1st September, 2026: Vawiin khan Aizawl Sumtual, MINCEO-ah UD&PA Minister Pu K. Sapdanga kaihhruainain Lunglei Municipal Council (LMC) area chhunga project hrang hrangte chu UD&PA Department chuan Lunglei Municipal Council hnenah a hlan chhawng.

He hun puala thutkhawmah hian Minister Pu K. Sapdanga chuan UD&PA Department-in LMC kuta project hrang hrang a hlan chhawng chu lawmawm a tih thu a sawi a. Budget leh funding lamah harsatna a awm ṭhin chung pawha LMC ten tlo leh ṭha taka hna an la thawk thei chu a lawmawm a ni, a ti. Minister chuan hmasawnna hnathawhte tluang taka a kal zui zel theih nan Department leh LMC te inkarah thawhhona ṭha awm zel se a duh thu sawiin, duhsakna a hlan nghal bawk a ni.

UD&PA Director Pu Jacob Lalawmpuia chuan project inhlan chhawna hriat tur leh zawm turte a sawi zau a. Project hrang hrangte LMC hnuaiah hlan a nih tawh avangin enkawlna leh hmalakna hna te LMC kutah a awm zui tawh dawn thu a sawi a. Hmasawnna hnathawhte hlawhtling taka kalpui a nih theih nan inhriatthiam tawnna leh thawhhona ṭha neih a pawimawh thu a sawi bawk.

LMC area chhunga hmasawnna ruhrel leh project pawimawh hrang hrang– Solid Waste Management Centre (I & II), LMC Complex (Sazaikawn), Transport Hub (Hrangchalkawn), Multi-Level Car Parking (Thuamluaia Mual), Lungei Park Renovation, Composite Urban Infrastructure leh Storm Drain sakna te chu UD&PA Department aṭangin LMC kutah hlan chhawn a ni.

He hunah hian UD&PA aṭangin Commissioner & Secretary Pu V. Lalsangliana, Director Pu Jacob Lalawmpuia leh thawktu dangte an tel a. LMC aṭangin Chairman Pu Lalzuithanga, Vice Chairman Pu K. Lalrinawma, Secretary Pu Lalremruata bakah official dangte an tel bawk; project zawh tawhte enkawl zui dan tur leh hmalakna hrang hrang an sawiho a ni.