1988/2026-2027

Dated Aizawl, the 28th August, 2026: Vawiin khan UD&PA changtu Minister Pu K.Sapdanga chuan Aizawl Smart City Ltd hnuaia sak Chaltlang Multi- Purpose Sports Complex chu khuallian niin a hawng. Education Minister Dr Vanlalthlana chu he hunah hian khual zahawm a ni.

UD&PA Minister chuan Aizawl Smart City Limited chu thla thar maia tawp tur a nih tawh  thu leh, mipui hman tur project tangkai tak tak an la hawng thei chu lawmawm a tih thu a sawi a. Smart City hmachhawp chhunzawm turin Mizoram Urban Development Agency Limited (MUDAL) din a ni tawh a, hnathawk tur lak mek niin a rang lama hna thawh tan tum a ni, a ti.

Pu K Sapdanga chuan Mizo thalai infiammiten hma an sawnna tur leh, ram chhung leh ram pawna sports inelna sangah Mizote an lan theih nan he Sports Complex hi tangkai taka an hman a beisei thu a sawi a. Mizo thalai zingah ruihhlo ngawlvei an tam em em a; chuvangin, a la ti ve ngai lo ten an tihchhin lohna tur leh a sim tawhte tan pawh damna hmun a nih theih nan he Sports Complex hi tangkai takin hmang se a duh thu a sawi bawk a ni.  

Multi-Purpose Sports Complex hawnna hi UD&PA Commissioner and Secretary Pu V Lalsangliana chuan a kaihruai a, Aizawl Smart City Ltd. CEO Pu CC Lalchhuangkima chuan Technical Report a pe a, Aizawl Smart City Ltd. CEO leh Management Committee aiawhten Complex hmunhma an inhlan a, Management Commitee Chairman Pu Lalhruaitluanga chuan lawmthu sawina in a hawnna programme hi a titawp a ni.

Chaltlang Multi-Purpose Sports Complex hi cheng vaibelchhe 14.33 senga sak a ni a. Tender hi December ni 4, 2021-ah tihchhuah niin, November ni 30, 2022-ah hna an thawk tan a; August ni 20, 2026-ah sak zawh a ni. 

Sports Complex hawn takah hian Basketball cum Volleyball Court, mi 1000 thut lenna tur a awm a; jumbotron pawh dah tel a ni. Boxing Ring, mi 48 thut lenna tur leh table tennis khelhna tur pawh a awm bawk. Gym room leh Media room te, mi 12 ve ve lenna turin Girls Dormitory leh Boys Dormitory te,  Dressing Room, Toilet cum Bathroom, Dining Room leh Two Wheeler Parking Area a awm a, 25kVA Generator in he Sports Complex hi a chawm a ni.