2678/2024-2025

Aizawl, October ni 24, 2024: Urban Development & Poverty Alleviation (UD&PA) Department changtu Minister Pu K. Sapdanga chuan vawiin khan Aijal Club Park-a DAY-NULM Exhibition cum Food Festival an buatsaih chu khuallian niin a hawng. UD&PA Department hnuaia programme kalpui mek Deendayal Antyodaya Yojana National Urban Livelihoods Mission (DAY- NULM) hnuaia Aizawl City Mission Management Unit (CMMU) in festival a buatsaih hi ni 3 chhung awh tur a ni. 

DAY-NULM Exhibition Cum Street Food Festival hi DAY NULM beneficiaries te tana buatsaih niin, District hrang hrangah neih thin a ni a, tun tum hi a vawi 3 na niin, district dangah chuan kumtir lamah khan an lo nei tawh a ni. 

Hawnna inkhawmah khuallian Minister Pu K. Sapdanga chuan DAY-NULM in mi harsate chhawmdawl a, eizawnna neilote tana eizawnna ngelnghet an neih theih nan a hmalakpui chu mission ropui tak a nih thu a sawi a. Self Help Group tangkaina leh Mizoram hmun hrang hrangah sum lakluhna hnar tha takah an hman tawh thu a sawi a. Eizawnna tha leh ngelnghet neih theih nan a DAY-NULM hnuaia training pek chu lawmawm a tih thu a sawi bawk a. He hmalakna avanga hlawhtlinna hmutu te’n a tangkai zia an hmuh ang bawkin midangin a nachang an hriat ve zel a, tam zawkin hlawhtlinna kan chan theih nan induhsak tawn ni se tiin mi tam zawkin he scheme hi an chhawr tangkai a duh thu a sawi a ni. Chumi atan he nit hum awh tur festival hi inhrilhhriatna hmanraw tangkai taka a nih a beisei thu a sawi bawk. 

Festival hawnna inkhawm hi UD&PA Secratary Pu Malsawma Pachuau chuan kaihruaiin kalkhawmte lawmna thu a sawi a. UD&PA Director Dr. Andrew H. Vanlaldika, DAY-NULM Mission Director ni bawk chuan report a pe a. Self Help Group din leh kaihhruai piahlamah khawpuia thalaite eizawnna atan an thiamna leh tuina mila he hmalakna training pek a nih dan leh hmalakna hrang hrangte a sawifiah a. Pu Andrew Lalhruaia, Joint Director, UD&PA leh DAY-NULM Project Director ni bawk chuan lawmthu sawiin a hawnna inkhawm hi a khar a ni. 

Deendayal Antyodaya Yojan -National Urban Livelihood Mission (DAY-NULM) sawrkar laipui flagship programme niin, hian a tum ber chu khawpuia cheng mi harsa zawk te dinhmun chawikan a ni. 

DAY-NULM hnuaiah hian Self Help Group, Street Vendors,leh Skill training, beneficiaries te an awm a, an dinhmun chawikan nan DAY- NULM hnuaiah hian kawng hrang hranga zirtirna leh tanpuina pek thin an ni. HE mission kalpui a nih atangin mi 10,733 hnenah training pek ni tawhin India ram pum a hman theih certificate an dawng a, an zinga mi thahnem takin state chhung leh pawnah eizawnna ngelnghet tak tak an hmu tawh a ni. 

Exhibition Cum Street Food Festival hian October ni 26 thleng a awh dawn a, nitin zing dar 10:30 am atangin zan dar 8:00 p.m thleng mipuite tan dawr theih tura hawn thin a ni dawn a ni. He Festival ah hian DAY-NULM hnuaia beneficiaries ten an thiamthil hmanga thil chi hrang hrang an siam chhuah te lei theih turin phochhuah a ni a. Food Court te pawh awm in, hetah hian DAY-NULM hnuaia Street Food Vendors ten ei tur tuihnai tak tak an siam te lei theihin a awm bawk dawn a. Naupangte tan intihlimna tur buatsaih a ni bawk.