Vawiin khan Aizawl South-II Area Mizoram Upa Pawl Conference vawi 22-na chu ITI Veng YMA Hall-ah hman a ni a, UD&PA Minister Pu Zodintluanga chu Khuallian niin Bialtu MLA Col. Z.S.Zuala pawhin he hun hi a hmanpui a ni.

Aizawl South-II MUP President Pu Zasanga kaihhruai inkhawmah Khuallian Pu Zodintluanga chuan Mizote hi hmasang atang tawha aia upa te zah thin hnam kan ni a, chu kan thil chin thin chu kan hnam timawitu leh khalh ngiltu pawh a ni fo reng a ni, a ti. Hnam fing apiangin an upate an zah a, an duat a, an enkawl tha a, chu thuruk chu Mizote hian kan theihnghilh tur a ni lo, a chhan chu aia upa zah hi a Pathian thu a, nun tizahawmtu a ni a, awmdan dik pawh a ni, a ti bawk. Mizoram sorkar hmalakna te tarlangin Minister chuan hun reiloteah Mizoram chu kawlphethaa intodelh tur a nih thu te, ei leh bar lamah NLUP avangin chhungkaw tam takte an intungding mek thu te leh chung zinga ti tha duh si, vanduai vang liau liaua hlawhchham an lo awm chuan, anmahni chhawmdawlna tur Exit Protocol an tih chu sorkarin a duang leh mek a ni, a ti. Sorkarin ram hmasawnna tura hmachhawp a neih ang ang te leh hmalakna kawng hrang hrang a nei mekah te kum upa zawkten an thil tawn hriat (experience) atangin a tul anga sorkar chu finchhuah fo turin a chah bawk a ni.

Aizawl South-II MLA Col. Z.S.Zuala pawhin thu sawiin Mizo nun hrim hrim, eng kawngah pawh upa zawkten experience tha tak tak an lo neih tawh leh an thil hriat te chu thuziaka dah turin a chah a. Heng thu te hi thangthar lo kal zel tur atan thu ngaihnawm a tling dawn mai bakah Mizo zia leh hnam nunphung hrilhhriatna tha tak an tling thei a ni, a ti.