Vawiin khan UD&PA Minister Pu Zodintluanga chuan Lal Thanhawla Auditorium –ah Pradhan Mantri Awas Yojana- Housing For All a hawng a. Hawnna Inkhawm hi Tourism Minister Pu John Rotluangliana, Parliamentary Secretary Lt.Col(rtd) Z.S Zuala leh Deputy Chief Whip Pu R.L Pianmawia ten an hmanpui bawk a ni.
Pu Zodintluanga chuan Prime Minister’s Awas Yojana (PMAY-Urban) hi khawpuia in leh lo neilo te tanpuia, in neih tirna tur Scheme kum 2022 thleng awh tur, Sawrkar laipui Ministry of Housing & Urban Poverty Alleviation hnuaia Mission Programme a nih thu sawiin Mizoram chuan June 2015- a Prime Minister –in he Scheme a hawn atangin hma a lak tan ve nghal thu leh, India ram State zinga Detailed Project Report (DPR) submit hmasa leh sanction hmu hmasa ber pawl a nih thu a sawi a. Minister chuan he Scheme hi mi harsa kum khata sum nuai thum la lut tlinglo te tana ruahman anih thu leh insak tanpuina dawng tur chuan insakna hmun tur ram an neih ngaiin inhmun hi tanpuina dawngtu hmingin a awm ngei a ngaih thu te a sawi a. PMAY-HFA (Urban) Mission- ah hian Mizorama khawpui 23 ah hmalak tur niin, heng khuaah hian insak tanpuina chhungkaw 20000 chuang hnenah sem tum a ni a, tunah hian District Headquarter 8 tan in 10286 sakna tur DPR approval neih tawh niin, Lawngtlai leh Aizawl District- ah chuan hna tan nghal turin peih a ni tawh tih UD&PA minister chuan a sawi a. District Headquarter nilo khawpui (Census towns) 15 tan hian DPR buatsaih mek niin insak tanpuina dawng tur endik mek annih thu Minister chuan a sawi bawk. Pu Zodintluanga chuan insak chu uluk taka vil dan tur ruahman ani tih sawiin, insak lai hian vawi 5 lai report siam a ngaih dawn avangin insak tanpuina dawngtu tur te hnenah tanpuina sum chu thildanga hman atan pawhpen chi anihloh thu a sawi a. Chenna in tha tak an neih theih nan dik tak leh a nihna tur taka an sum dawnte hmang tura tanpuina dawng tur te chahin Sawrkar hmalakna hrang hrangte alo hlawhtlin zel nan tha taka tawiawm turin UD&PA Minister chuan mipuite a sawm bawk a ni.
Pradhan Mantri Awas Yojana- Housing For All(Urban ) hnuaiah hian Beneficiary-te chu insak tanpuina cheng 1,50,000 pek tur niin , hei bakah cheng 50000(singnga) hu a tha in emaw a bungrua in emaw Beneficiary –te chuan an tum ve a ngai dawn a, hemi belhkhawm hian in nuai hnih man hu an sa thei dawn a ni . He Scheme hnuaiah hian Housing Loan lak theihna Credit Linked Subsidy Scheme (CLSS) a awm bawk a, he Loan hi a pung tlem (6.5% interest subsidy) chi niin UD&PA Department in diltu te a lo endika, Bank lam in lo bawhzuiin, Mizoram chhunga Bank hrang hrang te chuan he Loan hi an pe chhuak mek a ni.
PMAY-HFA (Urban) hawnna inkhawm hi Dr.C. Vanlalramsanga UD&PA Secretary in kaihruaiin UD&PA Department Director in PMAY hnuaia an hmalak mekna report kimchang a pe a. Director chuan khawpui 23 atangin insak tanpui dilna 32144 an dawn tawh thu leh district 8 ah diltu 20639 awmin hemi zinga dawng thei mi 16143 atangin beneficiary 10286 thlan an nih tawh thu a sawi a. Tun dinhmunah Aizawl District ah in 864 leh Lawngtlai District ah in 500 sakna tur chu sem theih tura peihfel anih tawh thu UD&PA Director chuan a sawi a ni.
Chawhnu lamah PMAY-HFA(urban) hnuaia insak tanpuina dawng tu turte zirtirna(sensitization workshop for beneficiaries) hun hman nghal a ni.
