Biate-a thingpui herna Samuel Tea Factory chu tukin zing khan UD&PA Minister Pu Zodintluanga’n a hawng.

Pu Zodintluanga chuan Biate khua a thingpui herna factory puitling din a ni ta chu lawmawm a tih thu sawiin Mizoram-ah kuthnathawktute tharchhuah atanga Zopa kutchhuak ngei thingpui siam a lo veta chu hmasawnna ropui tak a ni a ti a.

Tlangram loneih atangin kuthnathawktuten kumtluana rimtaka an thawh pawhin khamkhawp an thar loh avangin Mizoram Sorkarin ngaihtuahna tamtak  sengin kuthnathawktute eizawnnahlawk leh ngelnghet an neih theih nan NLUP a duang a. In 530 awmna khua Biate in tlangram loneih kalsanin NLUP tum an ti hlawhtling mek chu lawmawm a tih thu a tarlang.

Pu Zodintluanga chuan Biate khuaa thingpui chingtute chu Samuel Tea Factory mamawh chawm thei tura an tharchhuah tipung deuh deuh tur leh helai vela thingpui chinna hmun zauh zel turin a fuih a. Mizo thingpuife tharchhuah humhalh a, ti lar tur leh hralhchhuahna kawngah pawh sorkar atang pawha nasa zawka hmalakna tur a tam hle dawn a ni, a ti a. Biate a thingpui Industry ti hmasawn tura Samuel Tea Factory neitu ten sum tamtak senga hma an lo lak tawh na chu fakin an hnathawh hian Biate khua leh Mizoram pumpui tan hmasawnna lawmawm tak a thlen mek a ni, a ti a. Thingpui Industry hmasawnna tura NLUP atanga hmalakna chu lawmawm a tih thu a tarlang bawk.

Biate a thingpui herna, Samuel Tea Factory hian kum 2012 atang khan Biate khua thingpui chingtute tharchhuah hi a lei sak tan a. Hemi kum hian thingpui zik quintal 70 vel chauh her hmanin nikum khan Kg 17600 a her a ni. He factory atanga thingpuife siamchhuahte hi Kg-1 Rs.  200 in hralh chhuah a ni. He Factory hawnna inkhawm hi Biate VCP Pu R.V. Hluna’n a kaihruai a, Samuel Tea Factory aiawhin Pu C. Thanchuanga’n technical report a pe a. Pu R. Vanlalvena MLA; Tea Board of India hotute;  Biate khawtlang hruaitute; Tea Planner Society  leh official thahnem tak an tel a ni.