1623/2025-2026

Dated Aizawl the 26th September, 2025 : Vawiin khan Urban Development & Poverty Alleviation (UD&PA) Department buatsaih Angikaar Campaign ‘PM Awas Mela Shehri’ leh ‘Lok Kalyan Mela’ chu Aijal Club-ah UD&PA Secretary Pu Lalmalsawma Pachuau chuan a hawng.

Pu Lalmalsawma Pachuau chuan mipuite tana duan sawrkar scheme hrang hrang hnuaia hamthatnate mipui tam zawkin an dawn theih nan sawrkar chuan hma a lak thu leh chak zawka thawh zel an inhuam thu a sawi a. Hamthatna dawngtute chu ram hmasawn nana sawrkar progress partners an nih thu sawiin tanpuina sum leh loan an dawnte chu a hmanna tur dik taka an hman a pawimawh thu a sawi a. Mipui tamzawkin hamthatna an dawn theih nan bank-te nena thawhhona tha neih a pawimawh thu a sawi bawk a ni.

Vawiin hun hi UD&PA Director Pu Jacob Lalawmpuia’n a kaihruai a, UD&PA Joint Director Pu RL Zidinga hnen atangin report ngaihthlak a ni.

‘Lok Kalyan Mela’ campaign hi PM SVANidhi hnuaia street-vendor-te dinhmun chawikanna tura sawrkar hmalakna a ni a. He campaign hian a tum ber chu-

  1. PM-SVANidhi Scheme hnuaia loan dil thar duhte tana hun siam sak
  2. Scheme hnuaia loan lo dil tawh, la pek lohte hnena loan pek chhuah
  3. Loan dilna lut tawh, Bank lamin an dilna a thawn let lehte ennawn
  4. Loan la tawh, Digital payment la hmang lote hman tir tura puih
  5. Food Safety lama thawkte nena tang hova, Street Food Vendor-te eitur thianghlim zawka an siam theihna tura zirtirna pek
  6. Loan lo la tawh zawng zawngte leh an chhungkaw member-te social economic profiling tiha, Welfare Scheme hrang hrang an chhawr tangkai theihna tura hmalak

Mizoramah PMSVANidhi scheme hnuaiah hian Street Vendor mi 2,586 hnenah loan vawi khatna Rs. 10,000 theuh pek chhuah tawh niin, mi 751 hnenah loan vawi hnihna Rs. 20,000 theuh pek chhuah a ni tawh a, mi 123 hnenah loan vawi thumna Rs. 50,000 theuh pek chhuah tawh niin loan pek chhuah tawh zawng zawng hi Rs. 4.98 Crore a tling tawh a ni. PM-SVANidhi Scheme tharah hian loan vawi khatna Rs.10,000 ni thin kha Rs. 15,000 ah tih pun niin, loan vawi hnihna Rs.20,000 ni thin kha Rs. 25,000 ah tih pun a ni a, a vawi thumna erawh a ngai anga kalpui tur a ni. Loan latu Street Vendor-te hnenah Credit card pek an ni ang.

Street Vendors loan dil duhte tan heng hun leh hmunahte hian a dil theih a ni –

  • SBI account neite tan 29th September-ah SBI Regional Business Office Conference Hall, Zarkawt-ah a dil theih ang.
  • Dawrpui Multipurpose Hall Committee room-ah 30th September leh 1st October-ah dil theih a ni ang.

Angikaar Campaign ‘PM Awas Mela - Shehri’ hi PMAY-Urban hnuaia insak tanpuina chungchang mipui tam zawkin an hmelhriatna tura sawrkar hmalakna a ni a. He campaign hian a tum chu PMAY – U hnuaia tanpuina dawngtu ten PM Surya Ghar :Muft Bijli Yojana (Rooftop Solar Subsidy Scheme) leh PM SVANidhi te an hmelhriat a, chumi hmanga hamthatna an dawn theihte inhriattir a ni a. Angikaar Campaign chhung hian insak tanpuina dawng tawh ten an insak laia harsatna an tawhte an thlen theihna turin ‘Help desk’ buatsaih a ni.

PMAY-U hi Mizoram pumah Census Towns 23 ahte kalpui a ni a, beneficiaries 36,789 awmin mi 23,813 ten in an sa zo tawh a, la sa zo lote chuan October, 2025 ralhma ngeiin an in saklai an sa zo tawh tur a ni a, in an sak stage tinah Directorate of UD&PA Deptt. ah in report tur an ni.

PMAY – Urban 2.0 hi Ministry of Housing & Urban Affairs (MoHUA) chuan 17th September, 2024 khan PMAY-U (phase 1) chhunzawmna turin a duang thar leh a. PMAY – U 2.0 hnuaia insak tanpuina hi Online Unified Web Portal hmangin dilna thehluh tur a ni a. He scheme hnuaia insak tanpuina dil duhte tana hriatturte – 

  • Chhungkua, nupa tuakkhat leh an fate nupui/pasal la nei lo an ni tur a ni.
  • India khua leh tui nihna identification an nei ngei tur a ni.
  • Economically Weaker Section (kum khat chhunga cheng nuaih 3 aia tam la lut lo) an ni tur a ni.
  • In sakna tur ram (LSC/Pass) an nei tur a ni.
  • Kum 7 tal tuna an chenna khuaah an cheng tawh tur a ni.
  • Income Certificate felfai tak a nei tur a ni.
  • Diltute chuan khawi hmunahmah Pucca/RCC (All weather house) an nei tur a ni lo.
  • Kum 20 chhung Housing Scheme dawng tawh tan a dil theih loh.
  • Tanpuina dawngtuten anmahni chenna tur in thar sain, an luah ngei tur a ni
  • Tanpuina dawngtuten Rs.62,500/- aia tlem lo insak nan an thawh ve tur a ni

Insak tanpuina dawn theih zat - 

  • Central sawrkar : Rs.2,25,000/-  
  • State sawrkar : Rs.25,000/-

Attachment

  • Loading attachment...