Vawiin khan Lunglei DC Office Chamber-ah Lunglei khawpui chhunga ui leh ran dangte khuahkhirh chungchang meeting neih a ni a; sorkar Department, Village Council leh NGO hrang hrang aiawhte an tel a ni.

Meeting kaihruaitu Addl. DC Pu Lalhmachhuana chuan mipui leh khawtlang hnen atanga ngenna leh report hmuh bawhzuiin meeting hi koh a nih thu a sawi a. Report hrang hrang ngaihthlak a nih hnuin, ui leh ran dangte nasa leh zuala khuahkhirh chu a tul thu leh veng tin VC te chu thuneihna pek an nih angin khuahkhirh dan tur chu an vengchhung theuhah kengkawh mai se tih an rel. VC leh tlawmngai pawl dangte tangkawpin ui leh ran dang vulhtute chu kokhawm a, dan leh hrem theihna dante inhrilhhriatna hun hman nise; thuchhuah zawm lo chu Dan angin ui/ran man sak leh pawisa chawi tir nise tih meeting-ah hian an rel bawk a ni.

Ran khuahkhirh chungchangah VC thuchhuah zawm duh lo lui an awm chuan VC ten District Sanitation Office-ah complaint thehluhin emaw District Administrator leh District Court thlenga complaint thehluh theih a ni.