1718/2022-2023
Aizawl 26th August 2022: Unique Identification Authority of India (UIDAI), Regional Office, Guwahati chuan vawiin khan Hotel Regency, Aizawlah State Level Workshop a buatsaih a. Thupuiah ‘Recent Initiatives for Simplifying Aadhaar Usage’ tih an hmang a. GAD Prinicipal Secretary Pu Navin Kumar Choudhary chuan he workshop hi a kaihruai a ni.

Pu Navin Kumar Choudhary chuan thusawiin Aadhar hi mipui mimir te hmasawnna tur sawrkar scheme hrang hrang, a thlenna tur dik taka a thlen theih nan leh a dawngtu tur dik takin an dawn ngeih theih nan a tangkai hle, a ti a. Nau pianghlimte tana birth registration an tihna hmunah Aadhaar enrolment hi tih theih ni se, birth certificate nen te thlun zawm vek ni se, a tangkai lehzual a beisei thu a sawi.

Pu Devajit Khound, DDG, UIDAI, Guwahati chuan India ram pumah Aadhaar pawimawhzia a sawifiah a. Sawrkarin tanpuina kawng hrang hranga a sem thin te a dawngtu tur dik tak ten an dawn ngei theihna turin Aadhaar hi a pawimawhin a tangkai hle a, a ti a. Sawrkar thuneitute chu Aadhaar Enabled Payment System hmang uar turin a fuih a ni.

He workshop-ah hian Aadhaar feature hrang hrang te, data privacy leh information security chungchang te sawi ho a ni. State Government hmalakna, scheme leh tanpuina te chu Aadhaar kaltlanga kalpui a tul na te, Direct Benefit Transfer pawimawhna te, Good Governance hnuaia notification ti chhuakturin Section 4 (4)(b)(ii) chungchang te chipchiar taka zirho a ni.