1972/2025-2026

Dated Hnahthial, the 3rd September, 2025: Vawiin khan SDEO Office buatsaihin Understanding of Lifelong Learning for All in Society (ULLAS) hnuaiah "Empowering Every Citizen Through Education" tih thupui hmangin "Literacy Week Rally" neih a ni a. SDEO, Pu S. Lalthanzuala kaihhruaiin zirlai naupangten Govt. Middle School atanga Govt. High School bul Volleyball court thleng kawng an zawh a ni.

SDEO chuan tun tum ULLAS thupui chu Mizo tawng chuan "Zirna hmanga mi zawng zawng chawi kan" a nih thu sawiin Mizoramah ziak leh chhiar thiam 100% kan nei kan tih laiin a nihna takah chuan 98.2% kan nih thu leh 95% kan kai vang zawka 100% anga puan kan nih thu a sawi a. Ziak leh chhiar thiamlo kan la awm nual thu sawiin zirlaite chu kan nu leh pa, pi leh pute ziak leh chhiar thiam lo an lo la awm a nih chuan ULLAS hnuaiah hian ziak leh chhiar an lo thiam zel theihna turin sawrkarin hmalakna tam tak a nei tih lo hrilh turin a chah a ni.