Mizoram sorkar leh UN Organisation pali te thawhhona ‘UN Joint Initiative Project’ Steering Committee hmasa ber chu nimin tlai dar 3 khan Chief Secretary Conference Hall-ah neih a ni.

He committee ah hian Mizoram sorkar aiawh Chief Secretary, Pi L. Tochhong leh UN Residence Co-ordinator Pi Lise Grande te chu Co-Chairman an ni ve ve a, UN Team member te leh Mizoram official pawimawh thenkhatte an tel a ni.

He meeting ah hian UN Team chuan hmalak an tum dan chi hrang hrang leh he Project 2014-2017 chhunga sum bituk hi hmalakna ah tul dan a zira tihpun chhoh theih a nih dante an sawi a, NLUP Implementing Board (NIB) atangin Nodal officer an neih turte an tarlang bawk.

Project hna tam berah United Nations Industrial Development Organisation (UNIDO) leh NLUP Board te thawk hovin, a hmalakna bakah endikna hna pawh an kutah a awm dawn tih an sawi a, United Nations Development Programme (UNDP) chu Fund Manager an nih tur thu an sawi bawk.

Nizan khan Chief Minister in a Bangalow ah zanriah a buatsaih sak a, hetah hian U.S. Consul General Pi Helen LaFave pawh a tel bawk.