Vawiin chawhma dar 10 khan New Secretariat Conference Hall-ah UN Mission Team, Ms. Ayumi Fujino, UNIDO Representative in India and Regional Director for South Asia, Dr. Peter Kenmore, Head of Food and Agriculture Organisation, Ms. Tine Stearmose, International Labour Organisation, Pu Jorn Sorensen, Country Director, UNDP, New Delhi, Pu Sandeep Tandon, National Expert Sustainable Energy for All, UNIDO, S. Asia leh Ms. Lianchawii, Programme Analyst, UNDP, New Delhi te chuan Mizoram sorkar hotute nen meeting an nei.

He meeting hi Pi L. Tochhong, Chief Secretary chuan kaihruaiin Mizoram chuan hmasawnna kawngah ke pen mekin, Mizoram chu hmalak nan a potential em em a, tun tuma UN Mission Team lokal hian rah tha tak a thlen ngei a beisei thute a sawi.

Pu R. Lalzirliana, Minister of Agriculture etc. leh he huna khuallian ni bawk chuan, UN Mission Team te chu lo lawmin, Mizoram sorkar Flagship Programme NLUP avanga UNO thlengin Mizoram in hriat a hlawh chu lawmawm a tih thu a sawi.

NLUP avangin leilung, thing leh maute nasa takin vawnhim a ni chho mek a chutih laiin hetiang vawnhim na lam leh ran vulh chungchangah te pawh mithiam puihna kan mamawh a, ran pul venna leh an hriselna pui turin Food and Agriculture Organisation te puihna kan mamawh hle a ni, tih Pu Zira chuan a sawi bawk.

Pu Lalzirliana chuan UN Team lokal te chu Mizoram nen tanghova, leilung leh thing leh maute tichhelova, eizawnna puitling mi rethei leh kuthnathawktuten an neih theih nan tangho ngei turin an duh thu a sawi bawk.

Pi Ayumi Fujino, UN Mission Team Leader chuan India hmarchhak states (NE States) ah te UNO chuan hmalakna hrang hrang a nei tan mek a, Mizoram bik erawh chu a sorkar leh mipui an inhawngin NLUP Programme tha tak duan anih avangin, thil chi hnih khat lek a State danga hma an lak ang ni lovin, an hmalakna chi hrang hrang te kalpui vek an tum thu leh ram leh leilung tichhe lova eizawnna ngelnghet siam turin hma an lak pui vat tur thu leh kumin chhung ngeia tan a nih a beisei thu a sawi.

Pu P.L. Thanga, NLUP Implementing Board Vice Chairman leh Planning Board Member Secretary ni bawk chuan Power Point Presentation hmangin NLUP hmalakna leh hlawhtlinna, leilung, lui, mau leh thingte venhimna atan a tangkai dan hrang hrang a entir chuan UN Team leh kalkhawmte rilru a hneh hle a ni.

UN Mission Team Member te hian an Organisation chan theuhte sawina hun neiin, heng ho hian a huhovin Mizoram tan an thawk dawn a ni.

UN Team te hi nimin khan lo thlengin, nizan lamah Pu H. Liansailova, Vice Chairman, Planning Board chuan NIB leh Mizoramsorkar hotu hrang hrangte nen zanriah a siamsak a, inkawmna hun tha tak an hmang. Zanin hian Tourist Lodge ah zanriah, hnam lam leh zai an tan hian buatsaih sak a ni ang.

UN Team te hian vawiin chhun vek khan Bamboo Processing Association leh mi dangte nen Secretariat Conference Room-ah meeting an nei nghal a. Chumi zawhah Press mite nen inkawmna an nei zui ang.