Union Budget Provision for 10% GBS (Gross Budgetary Support) for NE Region Major Programme Under Central Plan leh Centrally Sponsored Scheme (CSS) chungchang sawihona meeting pawimawh tak NLUP Conference Hall ah vawiin chhun khan Pu H. Liansailova, Vice Chairman, State Planning Board kaihhruaina in neih a ni a, Principal Secretary, Secretary leh Head of Departments te an tel kim hle.

Pu Lalram Thanga IFS, Principal Secretary to Chief Minister chuan Central sorkar leh State sorkar, a bikin Hmarchhuak state te hnena Plan sum in tum sem dan kalphung thar chungchang a sawifiah a. 50/50 percent chu Hmarchhak state tan leh a bikin Mizoram, chhiah lakluh nei tlem takte tan thil harsa anih dawn avangin Hmarchhak state Chief Minister ten Prime Minister leh Central Minister-te sawipui an tum thu leh kan Chief Minister Pu Lal Thanhawla pawhin he harsatna thu hi sawi a tum a ni, a ti.

Dr. C. Vanlalramsanga, IES, Secretary, State Planning Department pawhin 10% (GBS) Gross Budgetary Support Hmarchhak State tan a bika Central Ministry zawng zawngin hmasawnna atana an ruahman chungchang pawh a sawi nawn leh a. Fiah takin 10% GBS sum dah te pawh internet atanga la chhuakin, department tin te sem vek tawh an nih thu sawiin, he 10% GBS hi NLCPR/DoNER Pool Fund a a luh hma in a Ministry atangin direct a lakchhuah tum theuh turin Department te chu a fuih a. Theihtawpa department leh sorkar hnarkaitute an tan tlan chuan a huphurh awm lo a, tangkai leh taima taka bawhzui leh project te tih hlawhtlin ngei tum turin uar takin a fuih bawk. Chief Minister pawhin 10% GBS hi a hman dan kaihhruaina chiang zawka siam turin Central hotute a sawipuiin, Ministry thenkhat, State Department tan sum hman ve theih loh siamin Hmarchhak State chhunga an Central Office leh hnate thawh nan hmang tazawk an awm thu pawh a sawilang a ni. Hei pawh hi Chief Minister hian Central Minister-te sawipui a tum thu a sawi bawk.

Meeting kaihruaitu Pu H. Liansailova, Vice Chairman State Planning Board chuan Central Plan Fund Resource atangin Line Department ten a tam thei ang ber project thehluh a, a theih anga state tan sum hailuh tum turin leh Central Ministry in an rawn thawh theih tur project ngaihtuah chhuak turin Department hotute chu a fuih a, amaherawh chu hetih rual hian a hnu lama state tana phurrit la ni thei project tangkai lo, pawisa hmuh na tur anih vanga siam chungchangah fimkhur turin Pu H. Liansailova chuan Department hotute a chah nghal bawk. Pu Liansailova chuan mipui leh sorkar hnathawk leh a hnarkaitu ten tih takzeta taima leh rinawm taka kan thawh chuan sum hi pawimawh bawk mahse, harsa em em lo in thui tak kan kal thei a ni a ti bawk.