No.6507/2020-2021
Vawiin chhun dar 12:30 khan Union Health Minister Dr Harsh Vardhan Chairman-na hnuaiah India ram state 7 - Mizoram, Maharashtra, Manipur, Tripura, Meghalaya, Uttrakhand leh Goa Health Minister-ten Video Conference an nei a, Health Minister Dr. R. Lalthangliana pawh telin COVID-19 dona kawnga Mizoramin hma a lak dan te leh mamawhte a thlen a ni.
Video Conference-ah hian COVID-19 dona kawnga Mizoram hmalak dan in fak a hlawh hle a. State dang ngaihtuahin COVID-19 Positive Mizoramah an tlem bakah COVID-19 vanga boral pahnih chauh an la awm thu tarlan niin, hengte hi state pumpuia COVID-19 donaah sawrkar leh mipui tanrualna tha tak vang a nih thu tarlan bakah tunhnaia Mizoramin Child-Friendly Covid Care Centre a din thu te tarlan a ni.
He Video Conference-ah hian Dr R. Lalthangliana chuan Union Health Minister hnenah lawmthu sawi pahin Mizoram mamawh – district hrang hranga Covid Care Centre sakte, ZMC a RT-PCR reagent leh COVID-19 dona atana mamawh dang engemawzat a thlen a. Union Health Minister chuan a theih anga a lo bawhzui tur thu a hrilh nghal a ni.
Vawiina Video Conference hi remchanga la in hun kal tawh lama Mumbaia mizo damlo COVID-19 kaite a lo puihna-ah Health Minister chuan Maharashtra Health Minister Pu Rajesh Tope hnenah lawmthu a hrilh nghal bawk a ni.
Hon’ble Health Minister Dr R.Lalthangliana hi Dr Eric Zomawia, MD, NHM leh Dr Pachuau Lalmalsawma, Official Spokesperson & State Nodal Officer for COVID-19, Health & Family Welfare Department, ten an tawiawm a ni.
