Union Home Minister Pu Rajnath Singh hoin vawiin khan Guwahati Khanapara a AssamAdministrativeStaffCollegeah security chungchangah hmarchhak state pariat Chief Minister te nen meeting pawimawh tak an nei.

Meeting ah hian Chief Minister Pu Lal Thanhawla chuan Mizoram chu state ralmuang tak a ni a ti a. Amaherawhchu hel pawl Manipur state a inkhuar, Hmar Peoples’ Convention (Democratics) inti ten Mizoramah sorkar leh mipui pawi an rawn khawih thin a ni tiin, kumin 2015 March ni 28 pawh khan Mizoram Legislative Assembly hnuaia Government Assurance Committee member te Zokhawthiang bulah lo lambunin police 3 an kaphlum a, midang 6 na takin an kap hliam bawk a ni a ti a. He pawl tawmbuk hi Assam, Manipur leh Mizoram inrina lai velah a awm avangin, umzuia man an harsa tih a sawi a. Assam leh Manipur sorkar hian Mizoram policete zalen taka an chet vel phalsak hi a tul a ni a ti. Mizoram awmna hi hmun pawimawh tak, international border 722 KMs a thui nei a nih avangin hmarchhak state thenkhata hel pawl ten silai leh thil dang tawlhruk nana an hman thin thu leh an chet velna chu enthlak reng an nih thu a sawi a. Mizoram invenhimna, security erawh an tiderthawng phalo a ni a ti. Mizoram tlak lama ralthuam chelek a che thin Reang (Bru) te pawh sorkarin a thunun thei a ni a ti.

Chief Minister chuan hetiang dinhmuna awm kan nih avang hian dan leh thupek hneh taka kenkawh anih theih nan central sorkar hnuaia ‘Security Related Expenditure’ (SRE) Scheme hi Mizoramah hman ve anih theihna turin Pu Rajnath Singh chu hmala turin a ngen nghal bawk a. Mizoram police force pawh thuam that a, modernisation kalpui tul a tihthu pawh a thlen a ni. Central ministry thenkhata an budget 10% hmarchhak state te tana dah tura tih (Gross Budgetary Support ) pawh hlenchhuah thin nise Pu Hawla chuan a ti bawk a. Ramri a kawngpui, border road 24 BRTF leh Project Pushpak of Border Roads Organisation tena an enkawl te chu central sorkar atanga sum hmuh that loh vangin kawng te hi a chhe hle tawh tih meetingah hian Chief Minister hian a sawichhuak bawk a. Indo-Bangladesh Bordera pal fencing leh motor kawngpui siam hna kalpui mekah contractorin an mahni duh anga an kalpui avangin heng laia chengten harsatna nasa tak an tawh phah thu a sawilang bawk a. Indo-Myanmar border vengtu atan BSF dah a that a rin thu sawilang bawkin, Border Wing Home Guards din phal nise tiin a thlen bawk . Chief Minister chuan khuanu rel chhiatrupna thlen thulhah chet lak dan zir tura ‘mock drill’ tun thla chhunga district hrang hranga neih tur pawh sawilangin, ‘civil defence’ pawh district tinah din tura hmalak mek a nih thu pawh a sawi a ni.

Chief Minister chuan hmarchhak state te special category status-a la dah chhunzawm zel turin NE Chief Minister ten 23 April 2015 khan Prime Minister hnenah memorandum an thehluh thu a sawi a. Heng bakah state matching share chungchangte, CSS, NEC leh NLCPR te, DPR pawmpui chungchangte leh Backward Region Grant Fund (BRGF) chungchangte a sawi bawk a ni.

Meeting-ah hian Union Minister of State for Home Affairs Pu Kiren Rijiju leh DoNER Minister Dr.Jitendra Singh te an tel a ni.