2762/2022-2023 

Aizawl 22nd November 2022: Mizorama zan hnih riak tura rawn zin Environment, Forest and Climate Change, Consumer Affairs leh Food & Public Distribution changtu Union Minister of State Pu Ashwini Kumar Choubey leh Mizoram Legislative Assembly Speaker Pu Lalrinliana Sailo te chu vawiin tlai khan Assembly Speaker Office Chamber ah an inkawm.

Assembly Speaker Pu Lalrinliana Sailo chuan Pu Ashwini Kumar Choubey chu Union Minister Mizoram Assembly House rawn tlawh hmasa bertu a nih thu hrilhin, lawmthu a sawi a. Hmarchhak state te ngaipawimawha Union Minister ten an rawn tlawh fo chu lawmawm a tih thu a sawi bawk. Mizoram Assembly dinhmun leh hmalakna hrang hrangte hrilhfiahin Assembly Speaker chuan e-vidhan project hnuaiah lehkha tel loin rorelna (paperless assembly session) an kalpui thuai dawn thu a sawi. Mizorama hmasawnna hnathawh hrang hrang ten leilung an tichereu thin chu pawi a tih thu hrilhin, Union Minister chu hemi kawngah hian hmalakpui turin a ngen a ni.

Union Minister chuan Mizoram chu ram nuam leh boruak thianghlim awmna a nih avangin nuam a tih thu a sawi a. Mizoram hmun zaa thena hmun sawmriat leh panga zet ramhnuaiin a khuh chu hmun danga awm ve lo, thil chhinchiahtlak tak a ni, a ti. Hmarchhak state te hmasawnna chu PM Narendra Modi kaihhruai sawrkar chuan a ngaihpawimawh thu a sawi a. Ram leilung venhim leh hmasawnna hnathawhte chu kal kawptir thiam a ngai a ti bawk. Kum 70 liam ta chhunga hmarchhak harsatnate chu hun rei lote chhunga chinfelsak an tum thu a sawi a. Khawpui chhunga ramhnuai siamna tur scheme - Nagar Van Scheme chu Municipal neite chauh huam tura duan ni mahse, Environment, Forest & Climate Change changtu Minister Pu TJ Lalnuntluanga hmalakna zarah Mizoram district zawng zawng te chu huam teltir vek an ni tih Assembly Speaker hi a hrilh a ni.

He hunah hian Pu Lalhmahruaia Zote, Commissioner & Secretary, Mizoram Legislative Assembly chuan Assembly Speaker hi a tawiawm a ni.