No.583/2020-2021
Aizawl, the 24th April 2020 : Vawiin tlai khan Union Minister Pu Narendra Singh Tomar, Agriculture, Farmers Welfare, Panchayati Raj leh Rural Development Ministry enkawltu hovin State leh UT 11 a Rural Development Minister ten video conferencing an nei a. Rural Development Department changtu Minister Pu Lalruatkima pawh he hunah hian a tel a, Mizoram dinhmun leh mamawhte a sawi. State hrang hrang ten MGNREGS, NRLM leh PMAY-G hnuaia an hmalakna sawiin an mamawh te an thlen a, inkharkhipna avanga thingtlang mipuite harsatna an sawilang bawk a ni.
Pu Lalruatkima chuan Mizorama thingtlang mipui tam zawkin MGNREGS hnuaia hnathawh chu tun ang hunkhirh taka ei bel berah an ring tih sawiin Sawrkar kum kalta a ni 100 inhlawh leiba pek tlak nan leh Sawrkar kum kal mek atan advance-a ni 100 hlawh tur sum a vaia belhkhawm cheng vaibelchhe 168.18 tunhnaia Sawrkar Laipuiin a released chu lawmthu a hrilh a. Hei hian nasa takin hripui leng avanga thingtlang mipuite harsatna tawh mek engemaw chen a sutkian theih tur thu a sawi a ni. Sawrkar kum kalta a RD Block 26 atangin RD Block 25 ah ni 100 inhlawh chu a full ni 100 in siam a nih thu leh Block pakhatah ni 99 inhlawhna siam a nih thu te Minister a hrilh a. COVID-19 avanga inkharkhipna kalpui laia, he hripui dona kawnga NRLM hmalakna te sawiin PMAY-G hnuaia kum 2020-21 atana chenna in 11,581 sak thar tur Ministry in a pawm chu lawmthu a sawi bawk a ni.
Tunhnai khan Mizoram Sawrkarin ni 100 inhlawhna a hnathawkte hlawh cheng 211 atanga cheng 225 a tihsan chu Sawrkar Laipuiin a pawm a. Sawrkar kum 2020-21 a Labour Budget nuai 200 person days inhlawhna tur Mizoramin a rawt pawh an pawm bawk a ni. April 2020 ah hian Job Card Holder 1,97,890 te tan inhlawhna 9,95,724 person days siam a ni tawh. NRLM hnuaia SHG ten hmaituamna 9600 leh PPE 529 an siam a. SRLM Block 10 huam chhungah AGEY motor 48 in mipui nitin mamawh leh tui in tur sem mek a ni bawk.
Minister hi Rural Development Department Secretary Pu Lalhmingthanga leh Department hotuten an tawiawm a ni.
