Vawiin khan National Higher Education Mission, ‘Rashtriya Uchchatar Shiksha Abhiyan (RUSA)” hnuaia India ram State hrang hrang-a Project zawh tawh 10 chu Pi Smriti Zubin Irani, Union Minister, Human Resource Development chuan Video Conferencing hmangin New Delhi atangin a hawng a. Heng project 10 zingah hian Govt. Zirtiri Residential Science College (Govt. ZRCC)-a ‘Language Laboratory’ pawh a tel a. He hun hi Govt. Zirtiri Residential Science College Language Laboratory atanga zawm niin, Pu Lalsawta, Finance Minister chuan a telpui a ni.
Union Minister chuan Mizorama Language Laboratory sak chu thil pawimawh leh tangkai tak nia a rin thu leh lawmawm a tih thu a sawi a. Zirtiri College zirlaite nen inkawmna hun tawi hmangin, zirlaite leh faculty-te tan State dangte nen exchange programme siam chungchang an zawhna chu thil tangkai tak leh ngaihtuah zui tlak nia a hriat thu a sawi a. Human Resource Development Ministry leh University Grants Commission tangkawpin India Hmarchhak zirlai harsa zualte tanpuina scholarship a lo siam tawh “Ishan Uday” chu ngaihven turin zirlaite a chah a. He scholarship hi College zirlai te tan a dil theih a, general, technical leh professional course a huam vek a ni.
Mizoram Finance Minister Pu Lalsawta pawhin RUSA hmalakna avanga Mizoram zirlaite tan hamthatna hmuh tur a awm chho zel chu lawmawm a tih thu Union Minister chu a hrilh a. Pi Smriti Irani pawhin thawhhona tha zawk Mizoram chu neihpui zawm zel a duh thu a sawi bawk.
Vawiina Govt. Zirtiri Residential Science College-a Language Laboratory hawn tak hi RUSA Equity Initiatives hnuaia Mizoram State Govt. College 24-ah Language lab siam turin hmalakna kal mek zing a mi a ni a. Pu K. Lalnghinglova, Secretary, Higher & Technical Education Dept., leh Department Official dang bakah RUSA Board member-te he hunah hian an an tel bawk. RUSA Project Digital Launch Programme hi hmun hrang hrang atanga thlir theih turin Internet -a pek chhuah (webcast) a ni a. India ram chhunga RUSA Fund dawng College hrang hrangte chuan he programme hi Projector hmangin an College Auditorium/Hall-ah an thlir hlawm a ni.
Govt. Zirtiri Residential Science College-a Language Lab rual a state danga RUSA hmalakna hawn te chu Model Degree College, Atmakur, Andhra Pradesh; New Model Degree College, Ranjandgaon, Chattisgarh; University of Kashmir, Sri Nagar-a laboratory thar; Computer & Library, Gopinath Singh Mahila College, Garhwa, Jharkhand; Digital Classroom and e-Content Learning Modules, Savitribhai Phule Pune University, Maharashtra; New Model Degree College, Sonepur, Odisha; Boys’ Hostel, Guru Nanak Dev University, Amritsar, Punjab; Online Admission and State RUSA Portals, Sikkim; Gender Sensitization Course, Hyderbad leh Digital Gender Atlas for Advancing Women’s Education, Mahabubnagar, Telengana-te an ni.
