1212/2024-2025

Aizawl, the 18th July, 2024: Vawiin chawhma khan Pu Bhagirath Choudhary, Union Minister of State for Agriculture and Farmers Welfare chuan College of Veterinary Sciences & Animal Husbandry (CVSc& AH), Central Agricultural University (CAU), Selesih-a Teaching Veterinary Clinical Complex (TVCC) leh Department of Veterinary Microbiology a tlawh a. College-in an sak thar Sales Booth leh Silver Jubliee Monument-te a hawng a, College Community Hall-a exhibition buatsaih a tlawh bakah loneitute leh ran vulhtute nen inkawmhona hun an hmang bawk.

Pu Bhagirath Choudhary, Union Minister of State for Agriculture and Farmers Welfare chuan TVCC a tlawhnaah hian Vety. college-in ran dam lo enkawlna a kalpui dan Prof. Fazal Ali Ahmed chuan a sawifiah a. Department of Veterinary Microbiology a tlawhna hunah hian Prof. Tapan Kumar Dutta chuan lo dawngsawngin, ran natna hrang hrang chhuichhuahna atana project hrang hrang an khawih tawh leh an khawih mekte hrilhfiahin a enpui bawk a. Heng bakah hian Department of Livestock Production Technology (LPT) hnuaia sak thar Sales booth chu Union Minister hian a hawng bawk a, hemi atang hian sa leh bawnghnute atanga tharchhuah ei tur thianghlim leh hrisel tak tak College hian a hralh chhuak reng a ni.

Union Minister of State Pu Bhagirath Choudhary hian Vety. College-in kum 25 an tlin hriatreng nana lung an phun silver jubilee monument a hawng bawk a. College campus-ah thing a phun hnuah Community Hall-a Exhibition buatsaih chu tlawhin a enfiah a, he hmunah hian Prof. Lalnuntluangi Hmar, Dean, College of Veterinary Sciences & Animal Husbandry kaihhruaiin loneitute leh ran vulhtute nen inkawmhona hun hlawkthlak tak neih chhunzawm a ni.

Pu Bhagirath Choudhary, Union Minister of State for Agriculture & Farmers Welfare chuan loneitute leh ran vulhtute chu ngaih pawimawh tur an nih thu leh kum 2029 ah chuan an thla tin lak luh hi a let 4-a pung tura hmalakna kalpui mek a nih thu a sawi a. An thlai leh sa tharchhuahte a hralhna lam kan ngaipawimawh tur a ni a, FPO hi thu mai ni lovin atakin kan kalpui tur a ni, a ti bawk.

Union Minister of State for Agriculture & Farmers Welfare Pu Bhagirath Choudhary hian nimin chawhnu khan Mizoram lo thlengin Lengpui Airport-ah Agriculture & Farmers Welfare Minister Pu PC Vanlalruata, Secretary to the Govt of Mizoram, Agriculture & Farmers Welfare Department Pi Ramdinliani leh sawrkar official pawimawh dangte'n an lo dawngsawng a. Ruahman dan chuan program pawimawh hrang hrangte a hman zawh fel hnuah naktuk chawhnu hian New Delhi-ah a kir leh dawn a ni.