809/2026-2027

Kolasib, 2nd June, 2026: Vawiin tlai khan Dr L Murugan, Union Minister of State for  Ministry of Information & Broadcasting and Ministry of Parliamentary Affairs chuan ni hnih cham turin Kolasib a thleng a. Tlai dar 3:00 khan Kolasib DC Conference Hall ah tlawmngai pawl hrang hrang - YMA, MHIP, MUP leh MJA Kolasib aiawhte kawmna hun a hmang a. Hemi zawh hian Kolasib District Deputy Commisioner, Pu H Dolianbuaia leh Department hrang hrang Head of Office-te nen inkawmna  a nei zui bawk.

He  inkawmkhawmna ah hian Union Minister of State, Dr L Murugan chuan thu sawiin, Prime Minister Narendra Modi leh sawrkar laipui chuan Hmarchhak (North East) hmasawnna chu a ngai pawimawh hle a ni, a ti a. "Prime Minister chuan North East hmasawnna hi India ram hmasawnna a ni a ti thin a, chuvang chuan mipuite hmasawn theih nan kawngpui leh hmasawnna ruhrel (infrastructure) tihchangtlun kawngah pawh nasa takin hma a la a ni," a ti. Head of Office te leh NGO aiawh kalkhawmte chu anmahni line theuha theihtawp chhuaha hna an thawk chu lawmawm a tih thu a sawi bawk.

Infiamna (Sports) leh hmeichhe dinhmun chawikanna (Women Empowerment) lamah te hmasawnna hmuh tur a awm chu lawmawm a tih thu a sawi a. Inkalpawhna a tha chho zel a, Bairabi leh Sairang inkar rel kawng pawh hman tan a ni tawh a, tunah phei chuan Rajdhani Express pawh Delhi leh Sairang inkarah a tlan tawh thu a tarlang. Hei hian Mizoramah  khualzin  a hip lut nasa hle a, State pawn atanga tlawhtu  nasa takin  a pung chho a ni, a ti.

State sawrkar leh Central sawrkar (DoNER Ministry) te tangkawpin district leh state hmasawnna turin tha an thawh nasa hle a, hmasawnna kalpui na tura ngaihpawimawh (priority) kan nih angin sawrkar laipui pawhin min duhsak hle a, chumi zarah chuan hmasawnna pawh a pung nasa hle a ni, a ti bawk.

Amah ngeiin a chan, Information & Broadcasting Ministry chungchang sawiin, Mizoram  film siamtute te pawh International Film Festival, Goa leh hmun dang dangah te an tel ve thei chu  lawmawm a tih thu a sawi a.  Film siamtu lian tak takte chu Mizoram hmun mawi tak taka shoot turin ala  sawihmuh ve tur thu a sawi a," tourism leh cinema lamah theihpatawpa hma la chhovin hmasawnna neih zel kan tum dawn a ni," a ti.

Sawrkar laipui hmalakna 'PM Surya Ghar' (In tina solar eng vuahna) chungchangah theihtawp chhuaha hma la turin kalkhawmte a chah a. Zirna chungchang tarlangin, primary education chu a bul thut a nih avangin a pawimawh hle a ti a, zirlai naupang zirna bansan (dropout rate) a sang chu pawi a tih thu sawiin, heng naupangte leh an nu leh pa te fuihna  kawngah theihpatawp chhuah a tul hle a ni, a ti.

Minister chuan kum 2047-a India ram ropui leh hmasawn a nih theih nana hmachhawp, 'Viksit Bharat 2047' tihlawhtling turin theihpatawp chhuah theuh turin kalkhawmte chu a chah bawk.

Union Minister in inkawmna hun a hmanpui lai hian Kolasib District chungchang leh Sawrkar schemes hrang hrang hmasawnna tarlanna PowerPoint hmanga tihchhuah a ni a , zawhna leh chhanna hun hman a ni bawk.

DC Conference Hall-a thutkhawmna neih zawh hian Union Minister hian Kolasib District Hospital a tlawh chhunzawm nghal a. Damdawi in a thlen hian District Medical Superintendent leh damdawi ina thawktuten an lo dawngsawng a, anmahni nen hian mipuite hnena hriselna leh in enkawlna kalpui dan leh damdawi in bungraw mamawh leh hmunhma (hospital infrastructure) chungchang sawiho in inkawmna hun  an hmang a ni.

Naktuk hian Union Minister hian PM SHRI School, Anganwadi Centre, Diakkawn High School, Regional Sports Training Center Saidan leh ICAR te a hmunah a tlawh ang a, chumi zawhah Delhi panin a kir leh nghal ang.