3773/2023-2024

2024 Ramtuk thla ni 11: Union Minister of State for Law & Justice (Independent Charge) leh Minister of State for Parliamentary Affairs & Culture ni kawp Pu Arjun Ram Meghwal chuan vawiin khan Kolasib tlawhin, Kolasib-a Sawrkar Laipui ruahmanna (CSS) hnuaia hmasawnna hna thawh hrang hrang thlir hovin head of office-te review meeting a neihpui a, tlawmngai pawlte leh CSS (centrally sponsored scheme) hamṭhatna dawngtu beneficiary-te nen inkawm hona hun a buatsaih bawk.

Union Minister of State Pu Arjun Ram Meghwal hi a Additional Private Secretary Pu RK Mishra leh State Protocol Officer Pu K. Laltlawmlova te'n lo ṭawiawmin, Kolasib Helipad-ah District Bawrhsap Pu John LT Sanga hovin official-te'n an lo dawngsawng a ni.

Sawrkar department official-te nena Kolasib DC Conference Hall-a review meeting buatsaihah Bawrhsap Pu John LT Sanga chuan Kolasib District dinhmun tlangpui leh District chhunga sawrkar hma lakna langsar zualte report a pe a. Department hrang hrang - Law & Judicial, RD, KVK, PHED, H&FW leh School Education department hotute'n an department kal tlanga Kolasib District chhunga CSS hnuaia hma lakna te a lem nen entirin an sawi fiah a. Zawhna leh chhanna leh sawi hona hun hman a ni bawk.

Union Minister of State Pu Arjun Ram Meghwal chuan Prime Minister-in Union MoS-te'n India hmarchhak state-te tlawh vek tur a tih tihhlawhtlin nana lo kal a nih bakah, Sawrkar Laipui hma lakna hrang hrang mipuiin ṭangkai thei ang bera an chhawr theih nan an mamawh ngaithla a, kawng kawhhmuh tura lo kal a ni bawk tih a sawi a. Mipuite chu sawrkarin an tana ruahmanna ṭha tak tak a siamte hre chiang a, chhawr ṭangkai tum turin a chah a. Department hrang hrang official-te pawh mipui hamṭhatna tura sawrkar ruahmannate mipuiin a nih dan tur taka an chhawr theih nan theih tawp chhuah zel turin a chah bawk.

Kolasib DC Conference Hall-a tlawmngai pawlte nena inkawm hona hun buatsaihah Union Minister of State hi Kolasib Sub-Headquarters YMA, Sub-Headquarters MHIP, District Headquarters MUP leh Mizoram Gorkha Youth Association hruaitute'n hmuin, an pawl dinhmun leh hma lak dan tlangpui an hrilhfiah bakah, mamawh hrang hrang an neihte a hnenah hian an thlen a. Union Minister of State chuan a hnena mamawh an thlente chu a theih anga bawhzuisak a tum thu a sawi a. Department hrang hrang hnuaia CSS beneficiary-te leh Self Help Group te pawh kawmin, an hma lakna leh hlawhtlinna te a sawipui bakah, hma an sawn zelna atana thil pawimawh hrang hrang a sawipui bawk.