565/2025-2026

Dated Aizawl, the 24th May, 2025: Vawiin khan Pu George Kurian, Minority Affairs and Fisheries, Animal Husbandry & Dairying Union Minister of State chuan Aizawl a lo thleng. Minister hi Pu Lalthansanga, Fisheries Minister leh Er. Lalrothanga, Fisheries Department Secretary-te bakah Pi Laltleipuii, Fisheries Director leh department hotu dangten Lengpui Airport-ah an lo dawngsawng a ni.

Union Minister hian Lengpui khaw chhunga mimal sangha dil siamte bakah North Eastern Council (NEC) hnuaia Fish Farmers' Training Centre dinna tur hmun, Laldenga Fisheries Demonstration Farm-te tlawhin, hma lak tum dante a enpui a. He hunah hian Fisheries Minister leh Department hotute chuan Mizorama sangha khawitute harsatna hrang hrang Minister hnenah hian thlenin, sangha khawi hmasawnna tura Sawrkar Laipuia state sawrkarin project a thehluh tawhte, Zawlnuam-a Integrated Aqua Park tur telin, lo pawmsak thuai a nih theihnan Union Minister chu an ngen a.

Union Minister chuan sangha khawitute sum lama an harsatna sutkianna atan Fish Farmers Producer Organisation (FFPO) hnuaia Equity Grant a kawhhmuh a. Sangha chaw lakna (fish feed acquisition) chungchanga an harsatna chu tualchhunga sangha chaw siamchhuah dan ngaihtuah tur leh startup ang zawng pawha an kalpui theih thu a hrilh a. Pu George Kurian-a hian sangha khawituten sawrkar hnuaia anmahni tana hamthatna awmte an hriat a ngai pawimawh hle a, outreach programme neihpui turin officer a lo thawn tur thu a sawi. Union Minister chuan Sawrkar Laipuiin hmarchhak state-te a ngaih pawimawh thu sawiin, Mizoram chuan sangha khawi lamah hmasawn theihna tam tak a nei tih a sawi bawk. Fisheries Department chuan hmalak theihna hmun hectare 24000-ah 26.5%-a kalpui a nih tawh thu an lo hrilh a ni.

Pu George Kurian-a hian Aizawl a lo thlen hnuin Khatla-ah Ornamental Fish Rearing Unit dinna tura Pradhan Mantri Matsya Samapada Yojana (PMMSY) scheme hnuaia ṭanpuina dawng tura thlan Sales Outlet a tlawh a. PMMSY chu Sawrkar Laipui-a Department of Fisheries, Ministry of Fisheries, Animal Husbandry and Dairying hnuaia hmalakna a ni a. A tum ber chu India ramah sangha khawi lama hmasawnna tluantling, khuarei daih, neiha, Blue Revolution thlen a ni a. Sangha khawi, enkawl, zawrh leh a kaihhnawih thila hmalak ngaihnate kalpuia, sangha khawitute hamthatna ngaihtuahsaka, tunlai mila her danglam leh tihchangtlun a tum a ni.

Pu George Kurian-a hi Mizoram Volleyball Association-ten Airport-ah an lo hmuak bawk a; zanin hian LPS Arena, Falkland-ah Pro Volleyball League inkhel a en ang a, naktukah New Delhi panin a haw leh dawn a ni.