No.6997/2020-2021
Vawiin khan Mizoram leh state dang 7 a Khelo India State Centre of Excellence te chu Union Minister, Sports & Youth Affairs, Pu Kiren Rijiju chuan video conferencing kaltlangin mipuite hman theih turin a hawng a. Sports Minister Pu Robert Romawia Royte, Karnataka Chief Minister Pu B.S Yediyurappa leh state danga Sports Minister te pawhin anmahni state theuha Centre of Excellence ‘virtual launching’ chu Union Minister hovin an nei a ni.
Union Sports Minister Pu Kiren Rijiju chuan state 8 a Centre of Excellence hawn a ni ta chu sports hmasawnna duhawm tak a nih thu sawiin India ramah sports culture kan neih theih nana bultanna tha tak a ni, a ti a. Prime Minister Pu Modi a hmathlir (vision)-ah India chu sporting nation a siam a tel tih sawiin Minister chuan thalai nuai tel fe in Sawrkar hmalakna te an thlirin an ngaihven reng a, Khelo India programme hi a hlawhtling hle a, Brand a ni tawh a, he Brand nena inkhungkaihna neih chu thalai infiammi tam tak te duh dan niin a sawi.
Pu Kiren Rijiju chuan India ram chu sports lamah talent nei tha ni mahse hmunhma tha te, remchhanna leh zirtirna lamah a hnufual avangin duh angin khawvel huap pawhin kan hlawhtling hlei thei lova. Sawrkar Laipui chuan 2028 Los Angeles Olympics ah Top 10 a India a tel theih nan theihtawp a chhuah mek thu a sawi a. Hemi atan hian Khelo India leh Centre of Excellence te hian an thawhhlawk ngei a rin thu a sawi bawk.
Sports Minister Pu Robert Romawia Royte chuan Rajiv Gandhi Sports Stadium a Khelo India State Centre of Excellence hawn a ni ta chu Mizoram tan hun lawmawm leh ni chhinchhiahtlak tak a nih thu a sawi a. Khelo India hnuaia ruahmanna hrang hrang ten sports hmasawnna nasa zawk a thlen ngei a beisei tih sawiin Minister chuan midangte entawntlak Centre of Excellence din chu Sawrkar duhdan a ni, a ti a. He hmalakna atan hian Sawrkarin theihtawp a chhuah dawn a ni, a ti bawk.
Vawiina Mizorama Khelo India Sports Centre of Excellence hawn a nih rual hian Arunachal Pradesh, Kerala, Karnataka, Manipur, Nagaland, Odisha leh Telangana ah hetiang Centre hi hawn a ni bawk a. Centre of Excellence tinah hian sports discipline 3 zel thlurbing niin Rajiv Gandhi Sports Stadium a Centre of Excellence ah chuan boxing, judo leh weightlifting discipline te dah a ni dawn a. Kum 4 chhunga heng centre mamawh tur zawng zawng – ruhrel, coaching leh training atan Sawrkar Laipuiin sum a ruahman tawh a ni.
Sports Minister hi Pu TC Pachhunga, Vice Chairman, Sports, Youth Affairs & Tourism Board; Pu H. Lalengmawia IAS, Secretary Sports & Youth Services; Pu Lalsangliana, Sports & Youth Services Director leh India ram aiawha tum hnih lai Olympics a tel tawh leh ramchhunga sports chawimawina sang Dhyan Chand Award dawngtu Pu C. Lalremsanga ten an tawiawm a ni.
