273/2025-2026

Aizawl dated 22nd April 2025: Mizoram tlawh a cham mek, Union Minister of State (Independent Charge) Pu Rao Inderjit Singh, Ministry of Statistics & Programme Implementation chuan vawiin chawhnu khan Planning & Programme Implementation Conference Hall, Aizawlah Mamit District chhunga hmalakna hrang hrang kalpui dan a enpui a.  A kaihhruaina hnuaiah Directorate of Economics & Statistics hnuai a Survey hrang hrang buatsaih dan thlir ho a ni bawk. He thutkhawmah hian Pu Lalmalsawma Pachuau, Secretary, Planning & Programme Implementation, Pu K.Laltlawmlova, Deputy Commissioner, Mamit District leh Pu B.Lalrinhlua, Director, Economics & Statistics leh Directorate of Economics & Statistics thawktute an tel a ni.

Union Minister of State Pu Rao Inderjit Singh chuan India state hrang hranga district hnufum (Aspirational District ) 112 thlanchhuahte tihhmasawnna tur a vil bik an ni chu ngaih pawimawh tur a nih thu sawiin, Niti Aayog hnuai a hmasawnna tehfung hrang hrang hrechiang tur leh awmze nei tak a hna kalpui turin  kalkhawmte a chah a. Niti Aayog-a thawktute nen inpawh tak a inbetawn reng thin turin a chah bawk.

Pu Rao Inderjit Singh chuan Aspirational District-a Deputy Commissioner-te chu an District chhunga harsatnate hrechiang a, sukiang tura ruahmannate siam hman a an awm a pawimawh thu a sawi a. Mizoram state chhung ah Corporate Social Responsibility (CSR) tam zawk a luh theih nan tan a lakpui tur thu leh Multi-Dimensional Poverty Index buatsaih a pawimawh thu a sawi bawk a ni. 

Union Minister of State hova thutkhawmah hian Mizoram dinhmun hriatchianna tur, Survey hrang hrang buatsaih tur a thawktute tan a Training mamawh a nih dan te tarlan a ni a. NITI Aayog hnuai a hmasawnna tehfung hrang hranga Mamit District dinhmun tarlanna leh hmachhawp awmte sawi ho niin, inkalpawhna changtlung zawk peihfel a nih hun ah chuan hmasawnna hna chak zawk a kalpui theih beisei a nih thu tarlan a ni bawk.