2749/2022-2023
Dated Aizawl the 22nd November 2022: Union Minister of State Pu Ashwini Kumar Choubey, Environment Forest and Climate Change changtu chuan tukin zing khan Prime Minister in Rozgar mela puala India ram puma thalai 71000 hnena online video conference kaltlanga appointment a pek chhuahna program Assam Rifle Loch Hall Aizawl atangin a hmanpui a, Mizoram chhung atanga thalai 79 hna hmu tharte hnenah appointment letter a hlan nghal bawk a ni.

He ni puala inkhawm tawi buatsaihah hian Union Minister chuan Prime Minister Narendra Modi kaihruaina hnuaiah Rojzar Mela hlawhtling taka a kal chho zel thei chu ropui a tih thu a sawi a, Aizawlah thalai 79 zet hnena amah ngeiin appointment letter a pe chhuak thei chu lawmawm a tih thu a sawi bawk.

Minister chuan thalaite ram tana an pawimawhzia sawiin, ram nghahfak an nih thu a sawi a, Yuva Shakti-Youth power is nation power tih sawiin thalai te an chak chuan ram a chak a ni, a ti. Hna hmu tharte hnenah chuan kawng engkimah malsawmna dawng tlaka an thawh a ngai a, chumi atan chuan rinawm taka an thawh a ngai a ni, a ti.

Prime Minister Modi kaihhruaina hnuaiah hmeichhiate tan hamthatna tam tak a awm thu sawiin, vawiina appointment dawng tam tak zinga mi pawh hmeichhia te an nih thu a sawi. Kalkhawmte hnenah chuan eng hna mah hna hnuaihnung a awm loh thu sawiin kawng engkimah kan ram dah hmasak-Nation first policy a pawimawh thu a sawi.

He appointment semna pual inkhawm hi Prime Minister Modi hmalakna Rojgar Mela huam chhung a mi a ni a. Vawiin khan Mizoram atang mi 79 - Assam Rifle 62, BSF 12 ,SSB 4 leh Indian Overseas Bank a hna hmu thar mi 1 hnenah appointment letter hlan a ni.

Union Minister hi MLA Pu BD Chakma leh Brig. Digvijay Singh DIG Assam Rifles leh sipai lama hotu lian dang ten an tawiawm a ni.