293/2025-2026

Dated Hnahthial, the 23rd April, 2025: Vawiin khan Union Minister of State (Independent Charge) for Planning, Statistics and Programme Implementation leh Minister of State for Culture, Pu Rao Inderjit Singh chuan Hnahthial District tlawhin Hnahthial District chhunga Central schemes hrang hrang kalpui a nih dan chu officials-te nen thlir hona an nei a. Schemes hrang hrang kalpui a nih danah mamawh awmte zawtin India ram chu chawisan a nih theih nan Mizoram tih hmasawn chu thil pawimawh tak a nih thu a sawi.

Union Minister of State chu Rallangtlang helipad-ah zing dar 10:50 khan tumin Hnahthial District Bawrhsap, Pi K. Vanlalruati leh officer dang ten an lo hmuak a. DC Conference Hall-ah tlang nghalin central scheme hrang hrang kalpui a nih dan en ho nghal a ni.

Pu Rao Inderjit Singh chuan thu sawiin Hnahthial District chang ni lo, Mizoram chu dan leh hrai kenkawh kawngah fakawm a tih thu leh India ram chhunga state ralmuang berte zing ami a ni chu fakawm a tih thu a sawi a. Hnahthial District chhunga central schemes kalpui dan hriat chian chu a rawn kal chhan ber a ni tiin Hnahthial District mai bakah Mizoram pumpui tih hmasawn chu an tum ber a nih thu a sawi a. Heng central schemes hman chhuah a nih dan leh puih an mamawhna lai hriat chian chu thil pawimawh tak a nih thu a sawi bawk. Heng schemes hmanga Hnahthial District-in hma a lo sawn chuan Mizoram pawn hma a sawn belh ang a, North East pumpui hian hma a sawn chuan India rawn hi ram changkang leh intodelh tak, developed country kan nih theih tur thu a sawi a ni.

Central schemes thlir hona, Review programme-ah hian Health & Family Welfare Department, Krishi Vigyan Kendra, Fisheries Department, Public Health Engineering, Rural Development Department, Education Department leh Women and Child Development te hnen atangin presentation thlir ho a ni a. Department tin ten Hnahthial District chhunga an Central schemes chan theuhte hmanga hma an lak dan thlirhona neih niin PM POSHAN, PMMSY, JJM, MGNREGA, PMAY leh schemes hrang hrang kalpui a nih dante leh tha zawka kalpui anih thei nan a an mamawhte chu Union Minister of State nen sawi ho nghal a ni.

Review Programme zawh hian Sub Hqrs YMA lam atangin Cheraw lam entir niin Govt Southern High school hnen atangin pipe band entir a ni a, Baby Vanlhriatpuii chuan zaiin mi a awi bawk a ni.

Union Minister of State chu Rallangtlang helipad atangin tlai dar 2:05 khan Lengpui Airport lam panin a chhuak a. Airport atang hian Delhi a pan nghal a ni.