419/2026-2027

Kolasib, 7th May, 2026: Vawiin khan Pu Suresh Gopi, Union Minister of State for Petroleum & Natural Gas and Tourism, Government of India chuan Kolasib a tlawh a. DC Conference Hall, Kolasib-ah district chhunga sawrkar department hrang hranga hotute (Head of Offices) nen inkawmhona an nei.

He hunah hian Kolasib district chanchin leh dinhmun tlangpui chu PowerPoint presentation hmanga tarlan a ni a. Union Minister Pu Suresh Gopi chuan Kolasib mipuite leh sawrkar hotute a hmu thei chu lawmawm a tih thu a sawi.

Minister chuan ram hmasawnna tura chhiarpui (Census) neih pawimawh zia sawiin, Chhiarpui chu mipuite dinhmun leh nihna dik tak hriatchianna a nih avangin, ram hmasawnna tura sawrkar ruahmanna (planning) siam nan a pawimawh em em a ni, a ti.

Mizoramin inkalpawhna (connectivity) tha zawk, a bikin rel kawng tha tak a nei chho mek chu lawmawm a tih thu a sawi a. Kawlphetha (power) kan mamawh ang kan inphuhruk theih nan hydro-electric project tam zawk neih theih dan ngaihtuah a pawimawh thu a tarlang bawk.

Zirna lam pawimawhna tarlangin Minister chuan, Kendriya Vidyalaya (KV) neih a pawimawh zia a sawi a. Mizoram pumah KV pakhat chauh a awm chu pawi a tih thu sawiin, KV a tam zel theih nan MP te hnena thlen nise a ti. Hmeichhiate zirna chuan ram hmasawnnaah kawngro a sut thui thu sawiin, nursing lamah te pawh tam zawka an kal theih nana hmalak a pawimawh a ni, a ti.

Basic fundamental education leh school education-in naupangte nuna kawngro a sut thui zia sawiin, a quality leh standard a that phawt chuan naupangten an thlen chin tur sang tak an thleng thei a ni, a ti bawk.

Mizoram chu leilung tha tak leh thlai tha tak tak thar chhuah theihna a nih angin, horticulture leh agriculture product te chu state pawn mai bakah ram pawn thlenga thawn chhuah a nih theih nan theihtawp chhuaha hmalak a pawimawh thu a sawi a. He inkawmna hunah hian department hrang hrang ten an department hnathawh dan tlangpui leh an mamawh hrang hrangte chu Minister hnenah hian an thlen nghal a ni.

DC Conference Hall-a hun an hman zawh hian Union Minister Pu Suresh Gopi hian Bukvannei-a Oil Palm Processing Mill chu a hmunah a tlawh a, hetah hian oil palm chingtute nen inkawmkhawmna an nei nghal a ni.