Union Minister of State for Textiles (Independent Charge), Pu Santosh Kumar Gangwar chuan vawiin khan Mizorama hmasa ber tur Apparel & Garment Making Centre, Industrial Growth Centre, Luangmual ami chu a hawng. Union Minister hi Pi Sadhvi Niranjan Jyoti, Minister of State for Food Processing leh Pu Arjun Munda, Jharkhand Chief Minister hlui bakah Ministry hnuaia Textiles lama officer pawimawh ten an tawiawm a. He hunah hian Industries Minister Pu H. Rohluna chu khualzahawm niin, Parliamentary Secretary Pu Joseph Lalhimpuia leh Sericulture Minister Dr. BD Chakma te an tel bawk.

Union Minister of State for Textiles chuan Apparel and Garments Making Centre chu Sorkar laipuiin Make In India hmalakna hnuaia eizawnna ngelnghet leh hmasawnna kawng siamsak a tumna kal mek hnuaia puitlin a nih thu sawiin, hemi atan State Sorkar tawiawmna leh NBCC hnathawh chungah lawmthu a sawi a. Mizo zinga textile leh thuamhnaw design leh siamchhuah kawnga tui mi te an ngaituahna leh suangtuahna chu eizawnna business hlawkthlak taka chantirna tur hmun anih thu Pu Santosh Kumar Gangwar chuan sawiin, Mizoram leh India hmarchhak state ten kawng hrang hrangah hnufual bikna leh harsatna an tawh chu a hriatthiam pui thu a sawi a. Apparel & Garment Making Centre hawn tak leh a bulhnaia Industrial Growth Centre chhunga centre hrang hrang awmte chu tangkai taka hman annih theih nan a panna kawh siamtha turin NEC a lo nawr tur thu a sawi a. Mizoram chu sericulture, handlooms leh apparel & garmenting hnuaiah project paruk, avaiin Rs. 114.82 crore hu sanction a nih thu sawiin, hemi ah hian Sorkar laipui share chu Rs. 102.90 crore ani a. Heng project hamthatna te hi a tam thei ang ber haichhuah anih theih nan an zavaia thlunzawm (convergence) pawimawh a tih thu a sawi bawk.

Khualzahawm Industries Minister Pu H. Rohluna chuan Mizo thalai ten khawl tha tak tak hmanga an thiamna belhchhah a, ei leh bara ram hmasawnna tur hawn a ni thei chu lawmawm a tih thu a sawi a. Industrial Growth Centre chu khawpui atanga a fal em avangin a panna tur lirthei (bus) hranpa siam te, training kal te chenna tur hostel siam chungchanga NBCC in DPR an siam te Ministry a a tul a lo bawhzui turin Union Minister chu a ngen a. Mizorama Integrated Skill Development Scheme (ISDS) kalpui mek chungchang sawiin, puantah mi 1,130 training pe tura he scheme hi duan niin tun dinhmunah mi 160 train zawh tawh niin, mi 278 training nei mek an awm a. He scheme kalpui nana sum dahthat atangin Sorkar laipui chuan first installment pechhuakin, hman mek a ni a; Tluang taka he scheme hi kalpui zel anih theih nan installment lo awm leh tur chu pek a nih vat theih a beisei thu Industries Minister hian Union Minister bulah hian a thlen bawk.

Parliamentary Secretary Pu Joseph Lalhimpuia chuan kalkhawmte lawmna thu sawiin, Mizote chu kutthemthiam hnam kan ni a, tunlai thiamna hmanga khawl tha leh changkang zawk hmanga hlawk zawka eizawnna tur hmun leh bungrua kan kawtkai ngeia chhawpchhuah ani ta chu a lawmawmin, kan ramin a tangkaipui ngei tur thu a sawi a. Chutihrual chuan Mizoram chu Food Processing lamah kan dinhmun a la that tawk loh thu leh, a ti chhun te pawhin mahni in atangin small-scale chauha la kalpui annih avangin Union Minister of State for Food Processing chu hmalakpui ah Parliamentary Secretary chuan a sawm bawk ani.

Dr. Kavita Gupta, IAS, Ministry of Textiles, Mumbai-a Textiles Commissioner chuan Ministry of Textiles hmalakna tlangpui a sawi a. Nikum 2015-2016 chhunga India GDP 3% chu Textiles Industry atanga thawhchhuah anih thu leh, Industry production 40% chu Textiles Industry thawhchhuah anih thu a tarlang a. India hmarchhak state-te tihhmasawn nan Textiles Ministry hnuaia din Project Approval & Monitoring Committee (PAMC) in a a ngaihtuah thu sawiin, handloom sector tihchangtlun chu an ngaihpawimawhte zing ami anih thu sawiin, State hrang hrangah pawh hmalak anih thu a sawi a. State leh Sorkar laipui thawhhona tha tak siamchhoh zel theih chu Ministry of Textiles in a duh thu a sawi bawk.

Vawiin hun hi Sericulture Minister Dr. BD Chakma chuan lawmtui sawiin hun a khar a. Union Minister leh a tawiawmtute chuan programme zawh hian New Delhi an pan nghal a ni.

Rs. 1426.15 lakhs seng a din Apparel & Garment Making Centre hi National Buildings Construction Corporation (India) Ltd. in sa in, kumin March khan an zo fel a. Anni hian Industries Department kutah an sak zawh hian an hlan a ni. 8948.61 sq metre bial chhungah 1,380 a zau theuh building (unit) pathum sak niin, building pakhat-ah hian puanthuina khawl 100 dahna hmun bakah pattern siamna hmun, puan zaina hmun, endikna hmun, choka, naupang awmna tur, office leh a dangte awmin, a vaiin unit khat hi room 17-ah then a ni.