2713/2022-2023
Aizawl, 18.11.2022: Chief Minister Pu Zoramthanga leh Union Minister for Tourism Pu G. Kishan Reddy chu tukin khan Raj Bhavan ah an inkawm.

Union Minister chuan International Tourism Mart hlawhting taka Mizoramin a thleng chu lawmawm a tih thu Chief Minister hrilhin, Tourism industry hi Mizoram leh India hmarchhak state ah nasa zawka a than len zel a, economy in hma a sawn phahna a nih ngei a duhsak thu a hrilh a ni.

Heng bakah hian India ram hmasawnna kawnga India hmarchhak state te, a bik takin thenawm ram te nena ramri intawma awmte pawimawh thu an sawi dun bawk a. Act East Policy chu a taka a hmel kan hmuh theih nan sawrkar laipuiin hma a lakpui mamawhna hrang hrangte a sawipui a. Chief Minister Pu Zoramthanga chuan thenawm ram ten remna leh muanna an neih chu India tan a pawimawh thu leh, remna an neih theih nan tha kan thawh ve ngei a pawimawh thu Union Minister hi a sawipui a ni.

Union Minister Pu G. K. Reddy hi vawiin khan New Delhi pan in Mizoram a chhuahsan a ni.