2379/2026-2027

Dated Aizawl, the 26th September 2026: Vawiin khan sawrkar laipui Social Justice and Empowerment Secretary Pu Sudhansh Pant, IAS hovin Social Welfare Department leh a kaihhnawih Department dangte nen Ministry of Social Justice & Empowerment hnuaia Scheme hrang hrang Mizoram Sawrkarin a kalpui dan thlirhona meeting, Secretariat Conference Hall, MINECO, Aizawlah neih a ni.

Union Secretary chuan Drug dona kawnga Mizoram sawrkar leh tlawmngai pawlte hmalakna a fak a. Demand Reducation-ah July thla khan Mizoram chu India ram pumah pakhatna niin he dinhmun hauh chhunzawm zel tura tan la turin a fuih. Nasha Mukt Bharat Abhiyan (NMBA) Drug Free India campaign chungchang sawiin he hmalakna hi India sawrkarin a ngai pawimawh hle a; drug nuaibo mai bakah addict ten an sim theihna tura tanpui te, enkawlna tha an dawn theihna tura tan lak te, a la ti ve ngailo ten tihchhin chakna an neih lohna tura awareness campaign ngawrh taka neih te chu ngaih pawimawh a nih thu a sawi.

Drug demand titawp tur leh a tawlhruk nuaibo turin Deparment hrang hrangte thawhhona a pawimawh, Secretary chuan a ti a. Narcotics Anonymous Booklet, Standard Operating Procedure (SOP) leh Drug Rehabilitation Centre-te accreditation chungchanga Mizoram sawrkar hmalakna fakin an tihdan tha entawn theih lai awm te an lo zir theihnan Ministry-ah thawnthla turin a hrilh a ni. Central YMA hmalakna pawh fakin Pu Sudhansh Pant chuan drug dona kawnga theihtawp chhuah zel tur leh, sawrkar laipui atanga sum an dawnte tangkai tak leh awmze neia an hman phawt chuan, Ministry-in a tanpui chhunzawm zel tur thu a sawi a ni.

Nasha Mukt Bharat Abhiyaan (NMBA) Drug Free India Campaign hi Mizoram District zawng zawngah kalpui niin hmalakna hrang hrang vawi 360 zet an kalpui tawh a; State, District leh Block level ah te Committee siamin mi 1,48,805 ten an chhawr tangkai tawh a ni. Addict te tan Integrated Rehabilitation Centre 10 siam a ni tawh a, District parukah De-addiction Centre a awm a, Outreach leh Drop-in Centre te siamin Aizawl leh Champhai District Hospital ah te Addiction Treatment Facility siam a ni. Hulhliap Short Stay hmalakna kaltlangin ruihhlo ngai 2,255 chuangin enkawlna an dawng tawh tih vawiin meeting-ah hian tarlan a ni.

Atal Vayo Abhyuday Yojana (AVYAY) hnuaiah kum upate enkawl dan Geriatric Caregiver training buatsaih a ni a. A thlawnin kum upa mi 613 tan Cataract surgery, dementia screening vawi 181 leh health camp vawi 475 buatsaih sak an ni tawh a. Kum upate chenna tura sak Senior Citizens Home-ah vawiin thlengin mi 84 admit an ni tawh.

SMILE kaltlangin Aizawl leh Lungleiah kutdawhten eizawnna tha zawk an neih theih dan kawng kawhhmuh leh tanpui kawngah hmalak a ni a. PM-AJAY hnuaiah Scheduled Caste hmeichhiate tan Falkawn, Muallungthu leh Lungleiah hostel sak mek a ni a, kumin sawrkar kumah peihfel hman beisei a ni. Sanitation worker mi 108 te hnenah Ayushman Bharat card pekchhuah a ni a. Mizoram District zawng zawngah Emergency Response Sanitation Unit leh Responsible Sanitation Authority din a ni bawk.

He meeting hi Mizoram Sawrkar Social Welfare Commissioner & Secretary Pi Lalzarmawii’n a kaihruai a. Pu Sudhir Kumar, Chief Secretary charge la mektu chuan sawihawnna hun a hmang a. Social Welfare Director Pu Vivek Kumar Tripathi chuan power point hmangin Mizoram sawrkar hmalakna hrang hrang a tarlang a. Social welfare scheme hrang hrang kengkawhtu department hotuten an hmalakna an sawi bawk a ni.