Mizorama UN Team cham mek zinga FAO aiawh Dr. A.B. Negi leh AH & Veterinary Department leh NIB lam atanga amah tawiawmtute chuan vawk natna avanga harsatna Mizoramin a tawhte sukiang tura hmalak dan ngaihtuahin Champhai leh a chhehvel an fang.
Nimin khan Dr. Negi hi Khawzawlah kalin, vawk vulhtute nen chipchiar taka inkawmna hun an nei a. Nikum March leh May thla inkara Mizorama vawk natna PRRS hrileng an hmachhawn dan leh ran enkawl chungchanga ran vulhtuten an sawi chu a ngaihthlak sak a. Champhai a thlen hnu in Champhai DC Pu Zoengsanga nen Mizorama FAO hmalak zelna tur leh thildang pawimawh tak takte sawiin inkawmna hun tha tak an nei a. Vawiin khan ram thenawm Myanmar atanga vawkte lakluh dan leh vawk natna hri inkaichhawn theih dante thlithlai in Zokhawthar ah a kal a, Customs hotute nen inkawmna hun a nei bawk a ni.
Dr. Negi chuan ram thenawm atanga vawk lakluhte atangin vawk natna PRRS leh hri dangte chu inkaichhawn theih a nih thu sawiin, ramri ah quarantine station siam theih a nih dawn leh dawnloh chu an thlithlai mek thu a sawi a. Quarantine station din theih a nih a, ram pahnih inkara vawk sumdawnna hi dan ang thlapa kalpui a nih theih bawk chuan vawk hrisel chauh Mizoram a lut dawn a ni, a ti.
UN Joint Initiative Project hnuaia kum 2015 chhunga FAO thiltumte sawiin Dr. A.B Negi chuan khaw tinah mi thlan bikte hnenah vawk enkawl dan mumal tak inzirtirna kalpui leh, hmeichhiate dinhmun chawikanna ni fawmin hemi ah hian a tam thei ang ber hmeichhia telh an nih turte a sawi a. Dr. Negi chuan hmalakna kalpui tak tak hma in chiang taka inhrilhfiah hmasak chu a ngaih pawimawh thu a sawilang a ni.
Dr. A.B. Negi hi UN Joint Initiative Project atana Mizoram Sorkar leh UNO thawhhona bawhzui tura tuna Mizorama India rama UN Agency pali cham mek zinga FAO agency aiawhtu a ni a. Champhaiah hian Dr. Jasper Rongura, Deputy Director (DI), AH & Vety, Dr. Lalchungnunga Pudaite, DVO, Champhai, Dr. T.C. Lalthanzauva, VO, Champhai, leh Pu Lalmuanawma Fanchun, Technical Officer, NIB ten an tawiawm a ni.
