United Nations General Assembly-in 20th November 1959 khan khawvela naupang zawng zawngte chanvo humhalhin ‘Declaration on the Rights of the Child’ a lo puang tawh a. Ni 20 November 1989 khan ‘Convention on the Rights of the Child’ chu ziak a ni leh a, hemi hnu hian khawvel ram 191-in he Convention hi pawmin kum tin he ni hi Universal Childrens Day-ah an hmang thin a ni. India-ah chuan, naupang ngaina tak thin, Prime Minister hlui Pandit Jawaharlal Nehru pianchampha phak puala rampuma Childrens’ Day hman thin nen kaikawpin vawiin ni angah hian ‘Universal Childrens’ Day’ hi hman tan a lo ni ta a ni. Mizoram-a he Ni puala inkhawm pui ber chu vawiin khan Bal Bhavan Society, Social Welfare Department leh Mizoram Children’s Organisation huaihawtin Aizawl Vanapa Hall-ah buatsaih a ni a, Social Welfare Minister Pu P.C. Lalthanliana’n a hmanpui a, sawm bik ISTHM Chairperson Pi Lal Riliani pawh a tel.

Social Welfare Minister Pu P.C. Lalthanliana chuan naupangte hmakhua thlirin ITI Vengin hmun tha tak an pekah Bal Bhavan hmunpui tur sorkar laipui tanpuina in sak thuai tum a ni, a ti a. Khawtlang nun siamthat a hun tawhzia sawilangin Minister chuan naupangte chunga hleihlenna dodal tul zia te, mahni fa leh naupangte enkawl aia thil pawimawh dang kan ngah lutuk ta te inenlet a, vawiin Childrens’ Day atanga rilru thar pu a, naupang duat leh lainat zir thar turin kalkhawmte a sawm a ni.

Mizoram Bal Bhavan Chairperson Pi Aileen Vanlalzawni chuan inlawmna thu a sawiah rampum huapa he Ni lawmna pui ber National Bal Bhavan, New Delhi-a neihah Mizoram aiawhin naupang 4 leh an hruaitu Instructor 1 an tel mek thu a tarlang a ni.

Vawiina Naupangte Ni pual hian State Museum, State Central Library leh Sahuan te chu man chawi lova naupang a duh apiang tlawh thei tura hawn a ni.