UNODC (United Nations Office on Drugs and Crime) leh World Vision India tangkawp chuan Mizorama ruihhlo do kawnga an hmalak zelnaah vawiin khan Mizoram Chamber of Commerce thawhpuiin Aijal Club-ah workshop an buatsaih a. He hun a khuallian Health Minister Pu Lal Thanzara chuan workshop hi a hawng a ni. “Mobilising Private Sector to Combat Health and Social Consequences of Drug Use in Mizoram” tih thupui hmangin workshop-ah hian ruihhlo dona kawnga private company-ten an hmalak theihna leh inpuihtawn theihnate inhrilhhriatna a hun hman a ni.

Minister Pu Lal Thanzara chuan tunlai media chak tak karah mipui nawlpui chuan ruihtheih thil chi hrang hrang leh a hmansual dan hrang hrangte kan hre tlang tawh a. Mahse kan hriatna hi a takin, rah tha chhuah thei tura hmalakna a hring mawh khawp a, chuvangin sawi mai piah lamah a taka tih hi mitin mawhphurhna a ni, a ti a. Ruihtheih thilin mihring taksa leh nunphung a tihbuai thu leh, hemi chungchanga sorkarin mipui tan a tihsak theih chu tamlo in, sem daihzai a ngaih thu a sawi a. Health care system-in a huap loh chin te chu Corporate Social Responsibility kaltlanga private company ten buaipui turin tih theih an neih ve thu leh, hemi kawnga hmalakna awm te chu lawmawm a tih thu Minister hian a sawi a ni.

Workshop hawnna huna thusawitu dang Pu Kunal Kishore, UNODC chuan Mizoramah Corporate Social Responsibility hnuaiah khawtlang tana thil tha leh tangkai tak tak private company-ten an tih thin thu leh, chu thil tha tih chu ruihhlo do na leh ruihhlo vanga harsatna tawk te tanpui nan a tangkai tura hmalak chu khawtlangin a mamawh leh a thatpui tur thu a sawi bawk a ni.

Vawiin hun hi Pu JT. Vanlalngheta, Secretary, Mizoram Youth Commission-in kaihruaiin, mithiam sawm te hnen atangin ruihhlo do leh harsatna tawkte enkawl dan chungchanga paper an buatsaihte ngaihthlak a ni a. Drop-In Centre tlawhna leh inkawmhona hun hman a ni bawk.