Zan hnih riaka Mizoram rawn tlawh, Union Public Service Commission (UPSC) Chairman Prof. D.P.Agrawal chuan niazan khan Chief Minister Pu Lal Thanhawla chu a chenna bungalow-ah a hmu.

Prof.D.P.Agrawal hian Mizoram a rawn kal chhan te sawiin, Mizoram chu mawi atih thu te Pu Hawla hi a hrilh a. Chief Minister chuan UPSC kaltlanga central service-ah Mizo kam tam thin thu leh tunah chuan kan tlem tawh thu te sawiin, hemi ti tha tur hian sorkar ina a din, Youth Commission chuan Mizo thalai tam zawk central service-a an luh theih nan IAS coaching te a siam thu UPSC Chairman hi a hrilh a. Skill Development lam pawh sorkar-in chak taka a kalpui chungchang te a hrilh bawk a, Prof. D.P.Agrawal chuan hetiang lam hi a tuina zawng anih thu a sawi bawk a ni.

Prof.D.P.Agrawal hi central sorkarin Mizoram sorkar hnuaia civil service officer nilo (non state civil service officer) te tana an kaisanna tur IAS Post khat (1), AGMUT Joint Cadre Mizoram segment a siam belh chungchanga candidate thlan chungchangah leh Mizoram Police Officers (MPS) pahnih IPS a hlankai tura Selection Committee Meeting nei tura lokal a ni a. Nimin khan Chief Secretary’s Conference room-ah IAS post 1 hnawhkhat tura candidate 5 leh MPS Officers 2 ten Selection Committee hmaah hian interview an hmachhawn a ni. Selection Committee ah hian Prof.D.P.Agrawal, UPSC Chairman, Mizoram sorkar aiawhin Pi L.Tochhawng, Chief Secretary, Pu K.A.Ganal, Addl Secretary, Ministry of Home Affairs leh Pu Prasant Trivedi, Joint Secretary,Ministry of Consumer Affairs te an thu a ni.

UPSC Chairman hian Governor Vakkom Purushothaman a hmu bawk a ni. Amah hi a nupui Pi Mridula Gupta in a rawn tawiawm a ni.