Vanapa Hall kawt ah Vanapa lim hun chu vawiin khan khan Art & Culture Minister Pu R.Romawia chuan a khuhna hawngin mipuite hmuh theih turin a pholang. Hemi hnu hian Vanapa Hall-ah inkhawm tawite buatsaih a ni nghal a ni. Vanapa lim hi Art & Culture Department hmalakna a siam niin lim siamtu hi Mizo zinga Master of Fine Arts (Sculpture) hmasaber James Khamliansawma siam a ni.

Pu R.Romawia chuan Mizote awm chhung chuan Mizoram history leh Mizote tan Vanapa hming chu a dai tawh dawn lo a tiin hmanlai Mizo pasaltha zingah chuan a hming a thang nasa hle in Mizote tan a chhuanawm thu a sawi. Tlawmngaihna nunpui lantirna kawngah te, ral relna kawngahte, Mizo ze tha leh khawtlang inenkawlna kawnga dan tha vawiin ni thlenga kan la chawm chhoh te hi Vanapa-in Mizote tana thil ropui a hnutchhiah a ni a, hengte ken chhoh zel hi hnam mawh a ni tiin thangthar ten Vanapa nun atangin zir tur tam tak an neih thu a sawi .

Mizo thil hlui leh hnam ro hlu te awmna chungchanga khaw leh khaw inkara inchuhna awm thin chungchang sawiin Minister chuan engpawh nise kan chian em em tur zawk chu heng thil te hi a awm ngei ani tih a ni a, a pawr zawnga heng thil te hi lak a fuh lo a ni, a ti. Vanapa lim din anih thei ta chu lawmawm tiin hemi chungchangah hmalatu Art & Culture Minister hlui Pu P.C. Zoram Sangliana thahnemngaihna chu fakawm a tih thu a sawi bawk. He programme puala inkhawm tawite Vanapa Hall-ah buatsaih Art & Culture Department Director Pu Ngurbiaka chuan kaihruaiin thuhma a sawi. Vanapa lim dinna kawnga hmalak dante chu Pu C. Laltlankima Research Officer leh Secreatary Vanapa Lim Committee chuan sawiin lim siamtu Pu James Khamliansawma chuan lim a siam dan chanchin kimchang a report a ni.

He programme-ah hian Mizoram Upa Pawl (MUP), Mizo Academy of Letters (MAL) leh INTACH Mizoram Chapter aiawh thahnem tak leh Vanapa thlahte pawh an tel a ni.

Art & Culture Department chuan Sawrkar kum 2012-2013 chhung khan Heritage Conservation hnuaiah Vanapa Lim siamna atan 13th Finance Commission atanga sum an hmuh atangin cheng nuai 9.5 an dah a. Vanapa lim din chungchang zau zawka ngaihtuah turin member 7 awmna Vanapa Lim Committee chu April 2013 khan an din a. Vanapa lim siam tur chuan Vanapa lem ziahsa neih a tul avangin Vanapa lem inziahsiak an buatsaih a, hemi atan hian Vanapa thlahte thlalak awm thei ang ang te an khawn khawm a. Vanapa lem inziahsiakna an buatsaih ah lemziak mi 24 zing atangin Tuidam naupang K.Lalrohlua lem ziah chu a tha ber ah thlangin he lem entawn hian Vanapa lim hi siam a ni.

Vanapa lim siam tur hian Pu James Khamliansawma chuan a zirna hmun Santiniketan chu nikum October khan pan thla in kumin April khan a siam hna chu a zo fel thei a. Vanapa lim hi feet 5 leh inches 6 vel sang niin dar pawlh dal chi khat, bronze metal tih hmanga siam a ni a, a siam nan hian bronze metal kg 250 vel hman niin a siamna senso hi cheng nuai 9.5 vel a ni. Bronze metal ti tuia luan tir nan hian lungalhthei quintal 9 leh thingtuah quintal 75 vel hman a ni.

Pu C. Lalaudinga ziah Vanapa (Thangzachhinga) Chanchin leh a Thlan tih a tarlan dan chuan Vanapa hming hi Thangzachhinga niin kum 1790 vel khan a piang a, kum 82 anih laiin kum 1871 khan Hnahlan ram Tuithoh luikamah a thi a ni.