No.3969/2020-2021

Vawiin khan Dr H Lalthlangliana, Deputy Commissioner, Kolasib chuan Cabinet meeting thutlukna bawhzuiin Vairengte checkgate paltlang a lirthei lo lut khalhtute leh mihring an phurh zawng zawng chu Rapid Antigen Test hmanga endik vek an nih tawh tur thu a sawi.

Dr H Lalthlangliana chuan Vairengte checkgate a screening point siam thar chu tlawhin thawktu dah tharte leh Medical team awm mek te a kawm a. Screening an neihna a hriattur pawimawh hrang hrangte hrilhhriatna hun hmangin, COVID-19 lak a kan ram a him theih nana thawktu pawimawh tak an nih angin, an hna chu rinawm tak leh theihtawp chhuah a, fimkhur taka thawk turin a chah a ni.

He hunah hian Dr Lalhlimpuia, CMO Kolasib pawhin thu sawiin, thawktu dah thar te chu uluk tak a zirtirna pek an nih thu a sawi a. Screenung point a swab sample la tur hian thawktu 6 dah belh an ni.

Vairengte checkgate a Rapid Antigen Test kalpui tur chungchangah a hnuai ami ang hian Kolasib DC chuan thuchhuah a siam.

Vairengte checkgate paltlang tur lirthei khalhtute leh motor-a chuang zawng zawngte tan a hriattur pawimawh

Ni 10.08.2020 (Thawhtanni) atang hian Vairengte checkgate paltlang tur lirthei khalhtute leh motora chuang zawng zawngte chuan Mizoram an rawn luh hma ngeiin Vairengte screening point-ah Rapid Antigen Test an nei hmasa ngei ngei tur a ni a. Hemi test paltlanga Negative ngeite chauh lo chuan checkgate an paltlang thei lovang. Heng a hnuaia tarlante hi an zawm ngei ngei tur a ni :

1) Vawiin (August ni 10, 2020) tlai atangin Vairengte checkgate atanga Mizorama lirthei rawn lut tur driver, handyman leh passenger (civil & army) zawng zawng Vairengte Medical Screening Point-ah Rapid Antigent Test hmanga test vek an ni tawh ang.

2) Hetih rual hian Bairabi leh Saiphai lamah bungrua leh passenger phur lirthei kaltlang phal a ni lo.

3) Lirthei test tawhte chuan test an ni tawh tih chhinchhiahna sticker/banner, checkgate-a authority ten an pek an lirthei ah an tar ngei tur a ni.

4) COVID-19 positive leh a kaihhnawih avanga lirthei tihkhawtlai (detained) te chu lirthei neituten a rang thei ang ber a laksawn dan an ngaihtuah tur a ni. Heng lirtheite hi tih thianghlim an nih hnu ah laksawn phalsak an ni ang. Laksawn dan tur chu Vairengte Police (SDPO/OC) te be pawp in ruahmanna an siam thin ang.

5) Tin, Rapid Antigen Test atanga positive an awm chuan Covid Care Centre thlenga dahluhnaah CMO kaihhruaina in Medical Officer in-charge, Vairengte in mawh a phur thin ang. Hemi atan hian a bik taka lirthei ruahman (dedicated vehicle) District Administration-in a ngaihtuah ang.

6) Test Negative-te hi mahni inah ni 14 chhung self monitoring-a enkawl zui tur a ni a, ni 14 chhung hian pawn chhuah phal a ni lova. Mahni hriselna uluk taka inenkawl zuiin, harsatna an neih chuan CMO, Kolasib hriattir tur a ni. Self monitoring-hi an kengkawh tha em tih an awmna hmun a VLTF/YMA branch hruaitu ten an lo vil chhunzawm tur a ni.