2740/2023-2024

7th November, 2023: General Election to the Mizoram Legislative Assembly, 2023 neih mekah Mizoram District 11 a Assembly Constituency 40 a Polling Station 1276 ahte boruak muanawm tak hnuaiah vote thlak a ni a. Hriat theih chinah 4:00 PM thlenga Mizoram puma vote tla zat chu 76.53% a ni. Hetih mek lai hian Polling Station thenkhatah vote thlak hi la kalpui mek zel a ni.

Vote a neihna hmun Ramhlun Polling Station -II, Govt. Primary School, 11- Aizawl North -II Assembly Constituency-a vote thlak hmasa ber ni tura kal, Mizoram Chief Minister Pu Zoramthanga’n vote a thlak lawk theih loh chungchangah District Election Officer, Aizawl chuan a tul anga hma la in a chhan a chhuichiang a. Chief Electoral Officer, Mizoram hnena report a thehluhin a tarlan danin Polling party-te zam leh hamhaihin button hmeh dan dik lovin an hmet palh hlauh mai a; hemi avang hian Chief Minister chuan a tum hunah vote a thlak thei ta lo a ni.

Hemi hnu hian Polling party-te chuan rang takin harsatna awmte an chingfel thuai a, vote pawh tluang taka thlak zui a ni. Khawl thlak a ngai lova, tluang taka vote thlak niin zing dar 9 thleng khan vote 113 a tla a, he Polling Station-ah hian voter 672 an awm a ni. Chief Minister pawhin tluang takin zing dar 9:46 AM khan vote a thlak a. Harsatna engmah awm lovin tluang taka vote thlak zui a ni.

Inthlanna dik, felfai leh langtlang siam a nih theih nan Polling Booth-a chetvelnate Webcasting hmangin uluk taka vil a ni a; Mizorama Polling Station awm zat 1276 zinga 53.25% ah hlawhtling taka webcasting neih a ni a, hei hi ECI bituk zat 50% aiin a tam a ni.