No.89/2021-2022
Aizawl 10th April, 2021: Tun hnaia vawk hrileng avanga Armed Veng chu Infected Area ah puan a nih avangin vawiin khan Armed Veng Community Centre-ah veng chhunga vawkvulhtute chu Bialtu MLA leh Minister Pu Robert Romawia Royte ruahmannain hmanhmawh taka koh khawm an ni a. Vawk hrileng laka invenna tur leh hmalakna tur pawimawhte sawiho a ni.
Pu Robert Romawia chuan hun reilote chhunga Armed Venga vawk 25 chuang lai a thi nghal mai chuan vawkvulhtute thin a thawng hle tih a sawi a. Vety Minister Dr. K.Beichhua leh Vety Board Vice Chairman Pu C.Lalmuanpuia te rawnin emergency meeting koh a ni, a ti a. He vawkhri leng mek hi hri hlauhawm chi nia mithiamten an rin thu leh Vety Department mithiamte kaihhruaina zawm turin Armed Veng vawkvulhtute chu a chah a ni.
Minister chuan Vawk hrileng do tura Vety Department-in tan an lak dan chu fakin Zoram mipui zawng zawngte fimkhur tur leh sorkar kaihhruaina te țha taka zawm turin a ngen a. Hripui do nana Department-in a bial chhunga hma an lakna ah theihtawp chhuahpui a tum thu a sawi a ni.
Vawiin meeting ah hian Dr Lalthankima Jt Director, Polyclinic,AH&Vety Department pawhin vawkhri leng mek chu African Swine Fever a nih an ring tih a sawi a. A vei zawng zawng chu thi ngei tura ngaih a nih avangin a taidarh loh nan vawkvulhtuten fimkhur taka hma lak a țul tih a sawi a. Dr P.C. Lalrokima Chief Veterinary Officer, Polyclinic Hospital,Dr Lalnghinglova DVO Aizawl leh Dr. Lalbiaknungi, Veterinary Officer ten vawkvulhtute chu zirtirna pein zawhna hrang hrang an neih te an hrilhfiah a ni.
He meeting hi Pu Lalzuiliana Chairman, Armed Veng Local Council in kaihruaiin Bialtu Minister leh Vety Department in Armed Veng vawkvulhtute hmakhua ngaia rang taka hma an lak avangin lawmthu a sawi a. Meetingah hian veng thenawm 3- Chhinga Veng, Armed Veng South leh Chite Veng LC Chairman te leh NGO hruaitute an tel tha hle a. Vawkvulhtu chhungkua aiawh mi 100 chuang an tel a ni.
Attachment
- Loading attachment...
